Aurkitu dute domekatik desagertuta zegoen urpeko arrantzalearen gorpua
HITZAk jakin ahal izan duenez, 13:00ak aldera aurkitu dute 24 urteko urpeko arrantzale zarauztarraren gorpua. Ertzaintzak albistea baieztatu du eta esan du Lekeitioko Santa Katalina itsasargiaren inguruan aurkitu dutela gorpua.
Argazkia: SOS Deiak HITZAk jakin ahal izan duenez, gaur [uztailak 6] 13:00ak aldera aurkitu dute domekatik Lekeitioko uretan desagertuta zegoen 24 urteko urpeko arrantzale zarauztarraren gorpua. HITZAk jakin duenez, Lekeitioko portura eraman dute gaztearen gorpua.
Ertzaintzak esan duenez, Santa Katalina itsasargiaren inguruan aurkitu dute gaztearen gorpua, desagertu zen inguruan bertan.
Gertaera. Domeka arratsaldean [uztailak 4] urpeko arrantzale bat desagertu zen Lekeitioko Santa Katalina itsasargiaren parean. Bi lagun zebiltzan arrantzan gune horretan, eta batek bestearen arrastoa galdu zuen. Ertzaintzari abisua 17:45 aldera eman zion.
Zarauztarra zen desagertua, eta 24 urte zituen. Esan zutenez, bi urpekariak adituak ziren, eta urteak zeramatzaten kirol hori praktikatzen.
Abisua jaso eta berehala jarri ziren abian bilaketa lanak, baina domekan behintzat ez zuten arrantzalea topatu; atzo [uztailak 5] 08:30ean berriz ekin zioten bilaketari. Ertzaintza, Larrialdi Zerbitzuak, Ondarroako Gurutze Gorriaren Itsas Salbamenduko zerbitzua eta Lekeitiko sorosleak aritu dira lanean, helikoptero batekin eta urpekariekin, 25 metro inguruko sakoneran. Horrez gain, Madriletik iritsitako Guardia Zibilaren GEAS urpeko jardueren talde berezia ere bilaketa lanetara gehitu da gaur, eta baita ere AZTI zentro zientifiko-teknologikoaren barku bat ere. Azken hori, batimetrian espezializatuta dagoen eta urpeko kartografiarako doitasun handiko sonar bat duen ontzi bat da.
