Elkartasun bertso saioa egingo dute uztailaren 24an Ondarroan
400 bat sarrera ipini dituzte salgai Ondarroa, Berriatua, Lekeitio, Markina-Xemein eta Mutrikuko zenbait tokitan. Punta-puntako bertsolariak gonbidatu dituzte Ondarroako frontoian egingo den saiora.
Ondarroako Etxerat elkarteak eta Sarek antolatuta, preso, iheslari eta erbesteratuekiko elkartasuna oinarri duen bertso saioa egingo da uztailaren 24an, Ondarroako frontoian. Antolatzaileek eskualdeko eta inguruko herrietako bertso zaleak gonbidatu dituzte saiora. 19:30ean hasiko da emanaldia, Danak etxea! lelopean. Punta-puntako bertsolariek parte hartuko dute, honakoek: Miren Amuriza, Onintza Enbeita, Nerea Ibarzabal, Unai Iturriaga, Sustrai Colina eta Jon Maia. Bertsutan Ondarruko Bertso Eskolako kideek egingo dituzte gai jartzaile lanak.
Antolatzaileek aurreratu dutenez, elkartasuna sustatzeko asmoz antolatu duten bertso saioa “bizia, alaia eta umoretsua” izango da. “Gai serioei buruzko bertsoak ere egongo dira, zelan ez, baina jokoa ematen duten gai alaiak ere aukeratuko ditugu. Gure asmoa da etortzen denak ondo pasatzea eta irribarre bategaz ateratzea”.
Sakabanaketak eragiten duen gastu ekonomikoari aurre egiteko diru laguntza lortzea du helburu bertsoak saioak. Txartelak honako lekuetan eskuratu ahal izango dira 10 euroren truke: Ondarroan, Kulixkan, Anaitasunan eta turismo bulegoan; Berriatuan, frontoian; Lekeition, Galarrenan; Markina-Xemeinen, Amaiurren; eta Mutrikun, Zubixan eta Txalapartan.
Indarrean dagoen araudia dela eta, harmailetan 400 bat eserleku egongo direla jakinarazi dute. “Kolore ezberdinetako txartelak ipini ditugu salgai. Gauzak errazteko, frontoia kolore horien arabera antolatuta egongo da; jendea dagokion kolorea duen tokitik sartu eta gune horietan eseri beharko da. Dena ondo antolatzeko, sasoiz agertzeko gomendioa egiten diogu jendeari; boluntarioek dagozkien azalpen guztiak emango dizkiete”.
