Beste 21 kasu erregistratu dituzte Lea-Artibai eta Mutrikun
Atzo [uztailak 14] lau herritan erregistratu zituzten kasuak: Mutriku (10), Lekeitio (5), Mendexa (4) eta Ondarroa (2). Mendexa ere 0 tasa edukitzetik 847,46ko tasa edukitzera pasatu da. Lurraldeetan, Araba ere gune laranjan sartu da gaur; hiru lurraldeetako tasak igo egin dira.
Egoerak okerrera egiten jarraitzen du. Eta horren adierazle dira datuak. Atzo [uztailak 14] beste 21 kasu erregistratu zituzten Lea-Artibai eta Mutrikun: 10 kasu Mutrikun erregistratu zituzten, 5 Lekeition, 4 Mendexan eta 2 Ondarroan. Ondorioz, lau herri horietako intzidentzia tasak igo egin dira; Mendexa 0 tasa edukitzetik 847,46ko tasa edukitzera pasatu da.
Egoera nola dagoen ikusita, Labi batzordeak atzo [uztailak 14] neurri berria ezarri zuen: gauerditik 06:00etara kalean bizikideen topaketak onartuko dira bakarrik. Eta neurri hori gaur [uztailak 15] gauerdian sartuko da indarrean. Iñigo Urkullu Etxebarriko Eika kooperatibaren lantokian izan da gaur, eta egoeraren irakurketa egin du: “Birusak gure artean jarraitzen du, aldatu egiten da eta badirudi aldaera hau besteak baino azkarrago mugitzen dela”.
Era berean, osasun arauak betetzea eskatu du, hala nola, jende pilaketarik ez sortzea, distantzia gordetzea eta maskara erabiltzea. “Toki batzuetan hori betearazi beharko dute Ertzaintzak eta Udaltzaingoak. Baina norberarengandik hasi beharko liratekeen kontuak dira”.
Bestalde, Espainiako Auzitegi Konstituzionalak alarma egoerako bi neurri baliogabetu izanaz ere hitz egin du. Izan ere, Auzitegi Konstituzionalak herritarren joan-etorria debekatzeko eta aisialdi eta ostalaritza jarduerak ixteko erabakiak konstituzioaren kontrakoak direla ebatzi du: “Nik, behintzat, ez dut Espainiako Auzitegi Konstituzionalak ebatzitakoarekin bat egiten. Bete beharrekoa da, baina ulertezina egiten zait”.
Lurraldeak. Gaur [uztailak 15] Araba ere gune laranjan sartu da. Arabak 312,83ko tasa dauka (35 puntu igo da), Bizkaiak 352,64koa (29 puntu igo da) eta Gipuzkoak 509,95ekoa (46 puntu igo da).
Herriz herriko intzidentzia tasa (eguneratuta):
- Amoroto: 240,96
- Aulesti: 149,70
- Berriatua: 79,55
- Etxebarria: 805,37
- Gizaburuaga: 0
- Ispaster: 0
- Lekeitio: 262,90 (69 puntu igo da)
- Markina-Xemein: 179,10
- Mendexa: 847,46 (atzo 0 tasa zeukan)
- Munitibar: 0
- Mutriku: 903,37 (188 puntu igo da)
- Ondarroa: 105,05 (24 puntu igo da)
- Ziortza-Bolibar: 455,58
Lea-Artibai eta Mutrikuko egoera epidemiologikoaren bilakaera, azarotik:
