Sormen lehiaketa antolatu dute, Gipuzkoako landa eremuko emakumeak ikustarazteko
'Landako emakumeak eta bizikidetza' da lehiaketaren gaia. Parte hartzera animatzen direnek euskarri grafiko bat aurkeztu beharko dute hausnarketa testu batekin batera.
Gipuzkoako landa eremuko emakumeen arteko elkar ezagutza eta saretzea bultzatzeko helburuarekin, eta emakumeen ahalduntze pertsonal eta kolektibo prozesuan beste katebegi bat sortu nahian, Landa Emakumeak Gara izeneko proiektua abiatu berri dute Landaola Federazioa osatzen duten Gipuzkoako Landa Garapenerako Elkarteek. Landaolaren barruan dago, besteak beste, Debemen, Deba Beheko Landa Garapenerako Elkartea.
“Landa eremuan azken urteetan idenfikatu ahal izan diren elkar trukerako espazio urrien eta honek ekar dezakeen bakardaderako joerekin hausteko” abiatu dute egitasmo berria. Eta proiektu horren barruan landu nahi diren oinarriak jarri edo lehen hausnarketa emateko asmoarekin martxan ipini duten lehen ekintza ere aurkeztu dute: sormen lehiaketa bat egitea erabaki dute iraila eta urria bitartean. “Lehiaketak landako emakumeak eta bizikidetza gaia du ardatz. Gai zehatz horren bitartez, Gipuzkoako emakume guztiak bertako landa eremuari, emakumeei eta bizikidetzari buruz gogoeta egitera bultzatu nahi ditugu”.
4.000 eurotik gora banatuko dituzte saritan. Irabazleek 600 eurora arteko sariak eskuratu ahal izango dituzte
Gipuzkoan erroldatutako emakume guztiei egin diete lehiaketan parte hartzeko gonbitea. “Landa eremuko bizikidetzak ertz asko dituenez, landa eremukoak diren emakumeez harago zabaltzen dugu parte hartzeko deialdia. Emakume horien guztien begiradekin ehundu nahi dugu bizikidetzaren oihala”. Lehiaketan parte hartzeko interesa dutenek, euskarri grafiko bat (argazki, marrazki, irudi, collage…) eta euskarri grafiko horri loturiko hausnarketa testu txiki bat aurkeztu beharko dituzte. Antolatzaileek azaldu dutenez, adinaren araberako hiru kategoria bereiziko dira: 25 urtetik beherakoak, 25-55 urte bitartekoak eta 55 urtetik gorakoak.
Izen ematea doakoa da eta Internet bidez egin beharko da nahitaez, Landaolaren webgunean. Lehiaketan parte hartzeko azken eguna urriaren 15a da. 4.000 eurotik gora banatuko dituzte saritan.Iragarri dutenez, kategoriako bakoitzeko hiruna sari banatuko dira. Irabazleek 600 euroko sari bana, bigarren sailkatuek 450 eurokoa eta hirugarren sailkatuek 300 euroko sari bana irabazteko aukera edukiko dute. “Lehiaketan parte hartzen dutenen artean euskarri grafiko eta hausnarketa arrakastatsuenak hautatuko dira”.
Horrez gain, sarituak direnekin bideo labur bat ere grabatzeko asmoa agertu dute antolatzaileek. “Abenduan bideo labur horren estreinaldia eta jasotako euskarri grafiko zein hausnarketen erakusketaren irekiera antolatuko dira. Dena egun bateko ekitaldian egingo da”. Aurreratu dutenez, lehiaketa fasetik lortutako emaitzak (sortutako euskarri, hausnarketa, ideia edo ondorio ezberdinak) Gipuzkoako landa emakumeen arteko elkar ezagutza eta saretzea bultzatzen jarraitzeko baliatuko dituzte proiektuaren hurrengo faseetan.
