Nagore Osorok ez du Ondarroako emakumeen trainerua entrenatzen jarraituko
Osororen ordez Eneko Azkarate ariko da emakumezkoen trainerua entrenatzen. Iñaki Errastik gizonezkoen trainerua entrenatzen jarraituko du beste urtebetez.
Nagore Osoro, artxiboko irudian. Ondarroako Arraun Elkarteak gaur [irailak 16] jakinarazi duenez, Osorok ez du 2022ko denboraldian Ondarroako emakumeen trainerua entrenatzen jarraituko. Dena dela, aurreratu dute oraindik ez dakitela patroi izaten jarraituko duen edo ez. “Erantzunaren zain gaude”, esan dute arraun elkarteko ordezkariek.
Osoro azken 3 urteetan aritu da Ondarroako emakumeen trainerua entrenatzen, eta arraun elkartekoek esan dute Osororentzako esker oneko berbak baino ez dituztela. “Taldeak esker oneko berbak baino ez ditu Nagorerentzat, proiektu honetan sinetsi duelako eta emakumeen traineruak eduki duen bilakaera aurrera eramaten lagundu duelako. Zorte on Nagore zure kirol etorkizunean eta baita ere pertsonalean!”.
Aurreratu dute Osororen ordez Eneko Azkarate ariko dela zeregin horretan. Azkarate Osororen laguntzaile eta emakumeen prestatzaile fisikoa izan da amaitu berri den denboraldian. Emakume nagusien trainerua entrenatzeaz gain, gazte mailako nesken entrenatzailea eta prestatzaile fisikoa ere izango da Azkarate.
Bide beretik, Iñaki Errastik beste urtebetez gizonezkoen trainerua entrenatzen jarraituko duela jakinarazi dute; Errastirentzako Ondarroa Arraun Elkartean egingo duen bosgarren denboraldia izango da 2022koa. “Eskerrik asko Iñaki proiektu honetan sinistearren eta zorte handia opa dizugu denboraldi berrian”.
