Geoparkeak pandemia aurreko bisitari kopurua berreskuratu du udan
Gutxigatik bada ere, 2019an baino bisitari kopuru handiagoa eduki du udan Euskal Kostaldeko Geoparkeak. Mutrikuko, Debako eta Zumaiako turismo bulegoek jaso duten bisitari kopurua ere nabarmen igo da.
Geoparkeko bisita gidatu bat. Argazkia: Euskal Kostaldeko Geoparkea. Geoparkea udan bisitatu duten lagunen kopuruak gora egin du aurten. Zehazki, 12.974 bisitarik parte hartu dute ekainean, uztailean eta abuztuan egin diren bisita gidatuean. Iazko eta 2019ko datuekin alderatuta, datuak hobeak izan direla azpimarratu dute Geoparkeko iturriek. Iaz, 10.285 bisitari hartu zituzten eta, 2019an, 12.868. “Gutxigatik bada ere, 2019ko datuak gainditzea oso albiste ona da Geoparkearentzat”.
Horrek guztiak Geoparkearen geoturismo eskaintza “aproposa” dela bermatzen duela uste du Leire Barriuso Geoparkeko kudeatzaileak. “Esfortzu handia egin dugu urte guztian irteera gidatuen programa mantentzeko. Izan ere, bisitariak jaso ezin zituenez, Geoparkeak doako bisita gidatuak eskaini zizkien Mutrikuko, Debako eta Zumaiako herritarrei, beren herrietako ondare geologiko, natural eta kulturalaz gozatzeko”.
Urte amaierara arte mantenduko dute bisita gidatuen programa
Mutrikuko, Debako eta Zumaiako turismo bulegoek jaso duten bisitari kopurua ere nabarmen igo dela gaineratu dute. “Ekainaren 1etik abuztuaren 31ra 21.552 bisitari hartu dituzte, iazko bikoitza“.
Nazioarteko mugikortasunean mugak jarrita daude oraindik, eta hori igarri egin dela esan dute. “Aurten Espainiar estatuko turismoan oinarritu da jarduna”. Mutrikun, esaterako, %76 estatuko bisitariak izan dira. Zumaian, kopuru hori zer edo zer handiagoa izan da: %80koa. Deban, aldiz, %40koa izan da. “Madrildik, Valentziatik eta Kataluniatik etorri dira batez ere”. Arabatik, Bizkaitik eta Gipuzkoatik etorritako bisitari kopuruak, berriz, behera egin du aurten. “Aurreko urteko datuekin alderatuta, gure kostaldera atzerritar gehiago hurbildu da”.
Geoparkeko balio natural eta kultural “itzela” ezagutzera emateko helburuarekin, urte amaierara arte mantenduko dute bisita gidatuen programa. Urrian, astelehenetan izan ezik, egunero eskainiko dira. Azaroan, ostera, astelehen eta eguaztenetan izan ezik, asteko beste egunetan Geoparkeak prestatu dituen proposamenez gozatzeko aukera egongo da. Abenduan, aldiz, eskaintza zer edo zer txikiagoa izango da; astebururo eta jaiegunetan eskainiko dituzte bisita gidatuak. “Bisita gidatuen egutegi osoa Geoparkearen webgunean kontsultatu daiteke. Erreserbak ere bertan egin daitezke”.
