Bainua debekatu dute Arrigorri hondartzan, legionella maila altuagatik
Bandera gorria ipini dute, urak ez dituela kalitateko irizpide mikrobiologikoak betetzen. Azaldu dutenez, ezarritako gehienezko muga hogei bidar gainditu da.
Uraren kalitateari buruzko ohiko analisia egin ostean, bainua debekatu dute gaur [irailak 23] goizean Ondarroako Arrigorri hondartzan. Bandera gorria ipini dute ostean, aldi baterako ezarri dute debekua. Eusko Jaurlaritzako Osasun Sailaren Bizkaiko ordezkaritzak ondorioztatu du urak ez dituela kalitateko irizpide mikrobiologikoak betetzen.
Azpimarratu dutenez, uretan gehiegizko kantitateetan aurkitu dute legionella bakteria. Eusko Jaurlaritzaren Bizkaiko bainu eremuaren kontrol sanitariorako programaren ordezkariek esan dutenez, martitzenean [irailak 21] egindako euri jasek legionella bakteriaren maila altua eragin dute hondartzako uretan. “Escherichia coli parametroa 1341/2007 Errege Dekretuak ezarritako mailak gainditu dira laginketa puntuan”. 500 NMP/100ml-tan ezarrita dago muga, baina Ondarroan 20 bidar gehiagoko kopurua neurtu dute: 10.462 NMP/100ml.
Eguaztenean [irailak 22] egindako neurketen emaitzak gaur [irailak 23] jaso ostean hartu dute erabakia. “Eusko Jaurlaritzak gaur eman dizkio emaitzak ezagutzera Ondarroako Udalari. Legionella, normalean, ur gozoetan edo ibai eta lakuetan egoten den bakteria da, baina azken egunetako euri jasen ondorioz ibaina behera etorri eta hondartzako uretan amaitu du”. Iragarri dutenez, Osasun Sailak egunero jarraituko du uraren kalitatea aztertzen, harik eta bainurako irizpideak betetzen dituela egiaztatu arte. “Emaitza berri horien berri izan arte bainua debekatuta egongo da”.
Kutsatutako eremua “oso mugatuta” dagoela esan dute. Hori dela eta, hurrengo neurketetako emaitzak hobeak izatea espero dutela aurreratu dute.
