San Migel jaiak bertan behera uzteko erabakia "penaz" hartu duela dio Markina-Xemeingo Udalak
COVID-19aren aurreko dekretuaren arabera, "Arretxinagako eremua jaietarako txiki geratu ahal zela ikusirik, bestelako aukera batzuk planteatu zituztela" azaldu dute.
Markina-Xemeingo Udalak jakitera eman duenez, “penaz” hartu dute Arrexe Arretxinagako Jai Batzordeak aurtengo San Migel jaiak bertan behera uzteko hartu duen erabakia. Azaldu dutenez, Arrexeko batzordekideekin bilera egin zuen udalak uztailean, eta bilera horretan COVID-19aren aurrean une horretan indarrean zegoen dekretua aztertu zuten. “Izan ere, ez da udala une bakoitzean bete beharreko neurri eta baldintzak zehazten dituena, Eusko Jaurlaritza eta Osasun Saila baizik”, argitu dute.
Udalak dionez, dekretua mahai gainean zutela udal teknikariek espazioen edukierak zehaztu zituzten, “pandemia hasi zenetik udaletik egin izan den moduan”. Jaiei begira, “Arretxinagako eremua txiki geratu ahal zela ikusirik, bestelako aukera batzuk planteatu zituztela” esan dute, besteak beste, Musika Eskolaren eraikineko bigarren solairua erabiltzea ekintzetarako. “Horrez gain, eta San Migel jaiak Markina-Xemeingo jai nagusietako bat direnez, ahalik eta herritar gehienek ekintzez gozatu ahal izateko beste aukera batzuk proposatu zituen udalak. Esaterako, kontzertuak Uni frontoian egitea. Hau da, udaletik aukera desberdinak planteatu ziren ekintzak beste era batera egiteko, baina ekintzak egitearen alde beti ere”.
Pandemia hasi zenetik, Markina-Xemeingo Udalak “kulturaren aldeko apustua” egin duela azpimarratu dute: “sektoreari laguntzeko ez ezik, herritarrei kultura eskaintzeko eta kultur ekintzak modu seguruan aurrera eraman ahal izateko lan handia egin da udaletik, unean uneko neurrietara egokituz ekintza guztiak”. Eta San Migel jaietarako ere diru sail bat gordeta eduki dutela argitu dute.
Udalak eskerrak eman dizkio Arretxinagako Jai Batzordeari urte guzti hauetan egin duen lan eta ahaleginagatik: “batzordearen lan eta ekarpenik barik ezinezkoa litzatekelako herritar guztiok Arretxinagako jaiez gozatzea”. Eta aurrera begira ere horrela izan dadin, “ezinbestekoa” dela esan dute “alde guztiek elkarlanean eta adostasunetik jardutea”.
