Erabilgarri dago Ondarbeltz eta Urazamendik lotzen dituen pasealekua
Lanen helburua bidearen zati horren segurtasun orokorra hobetzea izan dela diote. Pasealekua Mutriku-Deba zubiraino luzatu ezinaren zergatiaren berri ere eman du Azpiegituretako diputatuak.
Gipuzkoako Foru Aldundiko ordezkariak eta Mutrikuko eta Debako udal ordezkariak pasealekua zelan geratu den ikusten aritu dira gaur goizean egindako ekitaldian. Gipuzkoako Foru Aldundiak amaitutzat eman ditu Mutrikuko Ondarbeltz hondartza eta Urazamendik auzoa batzen dituen pasealekua eraikitzeko lanak. Mutrikuko herrigunea eta Urazamendik auzoa oinez batzeko falta zen 460 metroko pasealeku zatia zabalik dago jada, eta horren harira, gaur [irailak 29] lanak bertatik bertara ikusten aritu dira Markel Olano diputatu nagusia, Aintzane Oiarbide Bide Azpiegituretako diputatua, Joseba Palenzuela Mutrikuko alkatea eta Gilen Garcia Debako alkatea, Agustin Lopez-Doriga obraren zuzendariak lagunduta.
Pasealekuko azken zati horretako obrak 400.000 eurotik gorako aurrekontua izan du, eta gauzatzeko epea bost hilabetekoa izan da. Markel Olano diputatu nagusiak azpimarratu duenez, lanen helburua segurtasun orokorra hobetzea izan da. “Borobildu egin den obra bat da. Azken metro hauek gehituta, jendeak kostaldeko bi herrien (Mutriku eta Deba) arteko sei kilometroak oinez egin ahal izango ditu, galtzadan ibili beharrik izan gabe. Gainera, oinezkoen segurtasuna eta aire zabaleko ibilaldi osasuntsuaz gozatzeko aukerak areagotuko ditu, bi udalerriak lotzen dituen itsasoari begirako ingurune eder horretan; Gipuzkoako lekurik ederrenetariko bat bisitatzeko aukera edukiko du jendeak”.
2020ko udaberrian, GI-638 errepidearen hobekuntza eta Ondarbeltz hondartzako aparkalekuaren eta Mutrikuko hirigunearen arteko oinezkoen pasealekua jendearentzako ireki zirenean, jarduketa eremutik kanpo geratu zen orain amaitu berri duten zatia. Horren ondorioz, Urazamenditik Ondarbeltzera zihoazenek errepidearen bazterretik 200 metro inguru ibili behar izan dute nahitaez, baina horrek arrisku handiko egoerak eragiten zituen, bai oinezkoentzat eta baita ibilgailuentzat ere.
Azpiegiturak 200 metroko luzera duen hormigoizko harri lubetazko eustorma baten gainean eraikita dago. Berau, gainera, Ondarbeltzeko kantinako eta Gure Estalpe finkako hondakin urak biltzen dituen saneamendu hodia sartzeko ere baliatu dute. “Horrela, erabat desagertu dira Debako itsasadarrera egiten ziren ur beltzen isurketak”. Pasealekua Mutriku-Deba zubiraino luzatu ezinaren zergatiaren berri ere eman du Azpiegituretako diputatuak. “Jendearentzako askoz erosoagoa litzateke dena jarraian egitea, baina horretarako ibaiaren gainean hegal bat eraiki beharko genuke, eta hori ez digute baimentzen; horregatik jarri dugu semaforoa”.
