Zabalik dago Mutrikuko 35. mendizale helduen ibilaldian izena emateko epea
Urriaren 25a izena emateko azken eguna. Interesatuek Burumendiren webgunean izena eman behar dute.
Mutrikuko Burumendi Mendizale Elkarteak eta Gipuzkoako Mendizale Federazioak elkarlanean antolatuta eta Mutrikuko Udalak lagunduta, 35. Mendizale helduen ibilaldia egingo dute urriaren 31n Mutrikun. Burumendiko ordezkariek esan dutenez, zabalik dago izen ematea; urriaren 25a da horretarako azken eguna.
Izen ematea Burumendiren webgunean Mendizale helduen ibilaldia deritzon atalean dagoen inprimakia beteta egin behar da. Mendizale federatuentzat aurreikusitako ibilaldia da, eta ezarritako epe barruan gauzatzen bada, horien izen ematea doakoa da. Federatuta ez daudenek ere parte hartu dezakete, baina horiek 5 euro diru sarrera egin behar dute honako kontu korrontean: ES16-2095 5056 12 1067447648 (Kutxabank). “Ordainketa agirian parte hartzailearen izen-abizenak azaldu beharko dira”.
Indarrean dagoen segurtasun protokoloa beteta egingo dute 16 kilometro inguruko martxa
Martxaren egunean bertan ere izena emateko aukera egongo da, ibilaldia hasi baino ordu erdi lehenago Goiko Plazan horretarako ahalbidetutako mahaian. Hori bai, kasu horretan mendizale federatu zein ez federatuek 10 euro ordaindu beharko dituztela gogorarazi dute.
Mendizaleek 16 kilometro inguruko ibilbidea osatuko dute Mutriku ingurutzen duten auzoetatik zehar. Zeharkaldia 4 ordu eta erdian egiteko modukoa dela aurreikusi dute antolatzaileek. Honakoa da ibilbidea: Goiko Plaza-Ondabarro-Ibiri-Abeletxe-Lekonde-Intrinkulu-Oliturri-Kanpanzar-Apain-Kalbaixo-San Juan-Talaixa-Alkolea-Goiko Plaza. “Ibilbidea behar bezala seinaleztatua egongo da, kartel adierazleekin eta ageriko baliza zintekin, eta nahi duenak bidea zer edo zer mozteko aukera ere edukiko du. Tartean, ohi modura, atsedenaldia hartu eta hamaiketako ederra egingo dugu Galbaixo inguruan”.
Indarrean dagoen segurtasun protokoloa beteta egingo dute martxa. Parte hartzaileek era mailakatuan irtengo dute Goiko Plazatik. “Denek batera ez irteteko nahiarekin, 08:00ak hasiko dira lehenengo taldeak irtetzen, eta etorri ahala era mailakatuan irteera ematen jarraituko dugu 08:30ak arte. “.
