Zabalik dago Ondarroako Yaalah elkartearen materiala eskatzeko aukera
Eskaerak Internet bidez egin behar dira. Azaroaren 20a da horretarako azken eguna.
Ondarroa Yaalah elkarteak materiala eskatzeko beste aukera bat zabaldu du. Interesa dutenek zabalik daukate kirol-jertseak (helduentzako/umeentzako), kamisetak (helduentzako) eta poltsak eskatzeko aukera. Saharar herriaren aldeko hainbat euskal elkartek elkarlanean ateratzen duten egutegia eskatzeko aukera ere badagoela gaineratu dute. “Hainbat proiektutan eta bidaietan ateratako argazkiez osatuta dago egutegia”. Materialaren salmentatik lortzen den dirua elkartearen gastu orokorretarako eta urtean antolatzen dituzten ekimenetara eta elkartasun proiektuetara bideratuko dutela iragarri dute.
Materiala eskatzeko azken eguna azaroaren 20 da. Internet bidez egin behar dira eskariak, eskari orria beteta. “Eskaria egindakoan posta elektronikoz jakinaraziko dugu materiala noiz eta non jaso behar den; horretarako egun ezberdinak zehaztuko ditugu”. Jertse bakoitzak 25 euro balio ditu, kamiseta bakoitzak 12 euro, poltsa bakoitzak 8 euro eta egutegi bakoitzak 5 euro. “Ordainketa materiala hartzerakoan egin beharko da”.
Esan dute jertseak eta kamisetak enkarguz egingo dituztela. Hori dela eta, eskaria egiterako orduan neurria eta kolorea “ondo” aukeratzeko eskatu dute. “Eskaria egin ostean ezingo da aldatu”.
Jertse, kamiseta, poltsa edo egutegi bakoitzeko eskaera orri bana bete behar da. Eskaria egiterakoan ezinbestekoa da izen-abizenak, telefono zenbakia eta helbide elektroniko bat ipintzea. “Benetako izenarekin ez dauden eskariak ez ditugu kontuan hartuko, ezta modu egokian egiten ez direnak ere”. Edozein zalantza argitzeko yaalahelkartea@gmail.com posta elektronikora idatzi edo 682 98 68 39 telefono zenbakira deitu daiteke.
