Markina-Xemeingo Mendi Astea, gero eta hobeto
Aurtengo Mendi Astearen balorazioa egin dute Artibai Mendigoizale Taldekoek. Urtez urte, ekitaldietako parte hartzea handituz doala azaldu dute.
Artibai Mendigoizale taldeak antolatzen duen Mendi Astea ezinbesteko hitzordu bihurtu da mendizale eta baita horren mendizale ez diren askorentzat ere. Urtez urte, ekitaldietako parte hartzea handituz joan da, eta aurten, esate baterako, Mendi Film Festivaleko filmen emanaldiak orain arteko harrerarik onena eduki du. Mendi Astea errotuz doa, eta aurten ospatu den bosgarren jardunaldiaren gaineko balorazio positiboa egin dute antolatzaileek.
Azaldu dutenez, bosgarren Mendi Asteak ere erantzun ona izan du; parte hartze handia eduki dute ekintzek, eta bertatik sortzen diren proiektuak ere “fruituak ematen ari direla” nabarmendu dute. “Ahaztuen Oroimena taldeagaz zapatuan egin zen hitzaldia, esate baterako, ibilbide baten adierazle da, eta beste ekintzak ere sendotuz doaz. Hitzaldi eta proiekzioei dagokionez, Mendi Filmeko filmen emanaldiak orain arteko harrerarik onena eduki du. Bost urte dira antolatzen dugula, eta aretoa bete egin zen”.
Orientazio martxa.
Aurten Orientazio martxa ere berreskuratu ahal izan dute, eta 140 bat lagunek parte hartu zuten. “Eguraldia ere lagun eduki genuen, justu martxa amaituta hasi zen euria. Kontrakoa iragarrita bazegoen ere kanpoko ekintza bakarrean eguraldi ona eduki genuen”.
Pou anaien proiekzio eta hitzaldiak ere interesa eragin zuen. “Eurekin partekatzeko aukera ere eduki genuen, mendizale ezberdinen arteko topaketetatik proiektu berri eta onak atera ohi dira eta”. Beste talde batzuekin izandako harremanetatik sortutako proiektua da, esaterako, Ahaztuen Oroimenagaz martxan duten memoria ibilbideen proiektua. Elkarlan horretatik antolatu dute Mendi Astearen baitan hitzaldi bat ere. Hitzaldi horretan Baldaburun egindako indusketa arkeologikoen emaitzak ezagutzera eman zituzten Josu Santamarina Otaola arkeologo eta indusketen arduradunak eta Ahaztuen Oroimena elkartekoek. “Hitzaldian, egia esan, guk uste baino jende gehiago egon zen. Udaletxeko osoko bilkura aretoa bete egin zen”.
Baldaburuko indusketa arkeologikoen emaitzak aurkezteko hitzaldia. Argazkia: Ahaztuen Oroimena elkartea
Hitzaldia streaming bidez ematen ahalegindu zen Ahaztuen Oroimena elkartea, baina soinuagaz arazo batzuk eduki zituzten. Hala ere, bideo bat egiteko ahaleginetan dabiltza eta elkartearen youtubeko kanalean jarriko dute. “36ko gerrako aztarna handirik aurkitu ez den arren, izan zuen eragin soziologikoa eta beste gai batzuen xehetasunak kontatu zituzten”.
“Denon artean ekintzaz beteriko asteburu bat antolatu genuen, eta jendea gogotsu dagoela ikusi dugu. Horregatik, aurten barikutik domekara bitartean antolatu dugun Mendi Astea berriro ere hasierako eredura itzuli eta eguenetik domekara luzatzea nahi dugu”.
Pou anaien proiekzioa eta hitzaldia. Argazkia: Artibai Mendigoizale Taldea
Dena dela nabarmendu dute, ekimena ez dela asteburu bakarrera mugatzen. “Hortik sortzen diren proiektu ezberdinak ere aurrera doaz, eta hori da interesgarriena. Mendi Asteburua da urtean egindako beharraren erakusle. Adibidez, Orientazio martxarako ere bide bat garbitu genuen, Karkaba deitzen duguna. Bide publiko zaharrak berreskuratzen ari gara apurka-apurka, horrek indarrean jartzen eta ezagutzera ematen. Jendeak ezagutu egin behar ditu erabiltzeko eta erabili egin behar ditu ahalik-eta hoberen mantentzeko”. Markina-Xemeinen dauden zuhaitzak ezagutzeko aukera ere eman zuen martxak.
Orientazio martxarako garbitu duten karkaba.
