Aurrerak beste porrot bat jaso du Zaldupen
Talde ondarrutarrak 1-4 galdu zuen zapatuan [azaroak 6] etxean, Beasainen aurka. Etxeko taldea partida berdintzeko zorian ere egon zen, baina ez zuten asmatu.
Aurreraren eta Beasainen arteko neurketa, Zaldupen. Argazkia: Aurrera Kirol Elkartea. Berriro ere galtzea suertatu zaio Aurrerari. Oraingoan Beasainen aurka eta nahikoa markagailu gogorrarekin gainera; taldeak 1-4 galdu zuen zapatuan [azaroak 6] Zaldupen. Partida zaila izan zen ondarrutarrentzat. Ligako talde gogorrenetariko baten aurka jokatzea egokitu zitzaien, eta partidan buru-belarri sartuta ibili baziren ere, ez zuten nahi besteko emaitzarik lortu. “Beasain hasieratik Aurrera baino gehiago izan zen, eta merezitako garaipena lortu zuten Zaldupen”, adierazi du Mikel Santiso Aurrerako presidenteak.
Lehen zatian partidan sartuta egon zen taldea, hala ere, 0-2ko markagailuagaz joan ziren aldageletara: Beasainek partida hasi eta gutxira egin zuen lehen gola, 8. minutuan, eta bigarrena 26. minutuan egin zuten. Aurrerak bigarren zatia hasi eta gutxira sartu zuen partidako gol bakarra, 54. minutuan. Epaileak penalti bat adierazi zuen, Beasaineko jokalari batek baloia eskuagaz ikutu ondoren. Luken Iturrinok jaurti zuen penaltia, baina Beasaineko atezainak gelditu egin bazuen ere, aldaratzean buruagaz Iturrinok berak sartu zuen gola.
[zuzenean ARGAZKI GALERIA IKUSI]
1-2agaz taldeak berdintzeko aukerekin ikusten zuen burua. Handik gutxira Gaizka Cortesek berdinketa lortzeko aukera ederra eduki zuen, baina Beasaineko atezainak jaurtiketa gelditu egin zuen. Hor baina etxeko taldearen gainbehera ailegatu zen. Berdintzeko nahiagaz erasoan sartuta ibili ziren, baina ez zuten erantzuteko gaitasunik erakutsi. Beasainek kontraeraso batean 1-3koa sartu zuten 61.minutuan. Partida hortik aurrera erabakita geratu zen, eta irabazteko aukera guztiak galdu egin zituzten. Nahi eta ezin batean ibili ziren eta laugarren gola jaso zuten etxekoek 77. minutuan.
Aurrerako presidenteak eskerrak eman nahi dizkie zapatuan Zaldupera hurreratu ziren zale guztiei. “Partidaren amaiera oso hunkigarria izan zen. Ikusita taldeak azken asteetan daraman bolada eskasa eta zelako porrota jaso zuen etxean, zaleak aldageletarako parera hurreratu ziren, eta txaloka aritu ziren. Jarraitzaileak gurekin sentitzen ditugu eta hori oso garrantzitsua eta eskertzekoa dela iruditzen zaigu”.
Azken porrotarren ostean, taldeak burua altxatu ezinda jarraitzen du. Azken jardunaldietan ezin izan du garaipenik erdietsi talde ondarrutarrak. Azken partidak nahikoa oker suertatu dira eta bost porrot jaso dituzte jarraian. Taldeak urriaren 8an irabazi zuen azken partida Amurrioren aurka; 1-2 irabazi zuten kanpoan. Azken jardunaldietako porroten ostean, sailkapenean behera egin dute, jaitsiera postuetatik gertu daude orain: 16. postuan daude 12 punturekin.
Baja askorekin jarraitzen dute, eta hori igarri egin da azken asteotako emaitzetan. “Baja asko eduki ditugu aspaldian. Ea horiek berreskuratu eta gure jokoa egiteko eta emaitzak hobetzeko gai garen hurrengo jardunaldietan. Nik uste dut horrek taldeari beste indar eta pisu bat emango diola. Bolada eskas baten aurrean gaude. Azken partidak galdu baditugu ere eta taldea egoera onean ez badago ere, konfiantza guztia dugu Mikel Etxaburu Pixki entrenatzaileagaz. Gure proiektuaren oinarrietako bat bera da eta argi daukagu beragaz egongo garela azken momentura arte”.
Hurrengo partidak ere zailak izango direla aurreikusten du presidenteak. “Sailkapenean goren dauden taldeen aurka ariko gara hurrengo hiru jardunaldietan; hiru partida horiek oso gogorrak izango dira guretzat. Domeka [azaroak 14] goizean Alaves B liderraren aurka neurtuko ditugu indarrak Gasteizen. Hurrengo jardunaldi biak etxean jokatuko ditugu Barakaldoren (6. postua ligan) eta Portugaleteren (bigarren sailkatua) aurka”.
