Besteak beste, 'Altsasu' antzezlana dakar Mutrikuko Antzerkiaz Blai jaialdiak
Punta-puntako lau euskal ekoizpen taularatuko dituzte barikutik [azaroak 12] azaroaren 28ra bitartean. Emanaldi guztiak Zabiel kultur etxeko ganbarako agertokian eskainiko dituzte.
Antzerki munduan murgiltzeko eta gosea asetzeko aukera bikaina edukiko dute beste urte batez Mutrikura hurreratuko diren zaleek. Antzerkiaz Blai jaialdiaren baitan punta-puntako lau euskal ekoizpen taularatuko dituzte barikutik [azaroak 12] azaroaren 28ra bitartean Zabiel kultur etxeko ganbarako agertokian. Horien artean, La Dramatica Errante konpainiak duela gutxi estreinatu duen Altsasu lana eskainiko dute. “Dauzkagun mugak kontuan hartuta, ahalegin berezia egin dugu ahalik eta lan eta ekoizpen indartsuenak ekartzeko. Altsasu lana ikusteko aukera gutxi egon dira orain arte, eta lan handia egin eta gorabeheera askoren ostean Mutrikura ekartzea lortu dugu”.
Altsasuko auzia gai nagusitzat duen antzezlana azaroaren 21ean taularatuko dute Egoitz Sanchez, Nagore Gonzalez, Ane Pikaza eta Aitor Borobila aktoreek. 2016an Altsasuko Koxka tabernan bi guardia zibilekin eta hain bikotekideekin izandako liskarrak eta ondoren etorri ziren atxiloketak eta epaiketa dira istoriaren oinarria, baina hortik abiatuta fikziozko istorio bat taularatuko dute. Hogei pertsonaren azalean sartuko dira, ia dekoraturik gabeko agertokian, eta Momotxorroaren irudia abiapuntutzat hartuta, Altsasuko inauterietako pertsonaiarik esanguratsuenetako bat eta azken urteetako kasu judizial polemikoenetako batean murgilduko dira.
Sarrerak turismo bulegoan eta Mutrikuko Udalaren webgunean agendaren atalean daude salgai
Artedrama eta Huts Teatroak elkarlanean taularatutako Atzerrian lurra garratz obra ezaguna, aldiz, aurtengo jaialdia zabaltzeaz arduratuko da. Taulagainean Ander Lipus aktore markina-xemeindarrak parte hartzen duen antzezlana ikusteko aukera egongo da barikuan [azaroak 12]. Azaroaren 26an, berriz, Tartean Teatroaren Ez dok ero lana eskainiko dute. Futbolariak eta printzesak lanak jaitsiko du aurtengo jaialdiaren teloia. 5 urtetik 12 urtera bitarteko haurrei zuzenduriko obra azaroaren 28an eskainiko dute. “Umorea eta musika uztartuta, estereotipoen gaia lantzen du esketx motzen bitartez. Parekidetasuna eta berdintasuna lantzeko egokia iruditu zaigu”.
Antolatzaileek antzerki zaletasuna duten guztiak gonbidatu dituzte jaialdira. Sarrerak turismo bulegoan eta Mutrikuko Udalaren webgunean agendaren atalean daude salgai, 3 euroren truke. Emanaldi bakoitzerako 80 sarrera daudela diote. “Iaz kiroldegian geneukan aforo berarekin Zabielen eskainiko ditugu emanaldiak; beti egin izan zen lekura bueltatuko da jaialdia”.
ANTZEZLANAK:
- Azaroak 12, barikua (19:30ean, Zabielen): Artedrama eta Huts teatroaren Atzerrian lurra garratz. Helduei zuzendutako emanaldia. Iraupena: 75 minutu.
- Azaroak 21, domeka (19:30ean, Zabielen): La dramaticamente Errante konpainiaren Altsasu. Helduei zuzendutako emanaldia. Iraupena: 75 minutu.
- Azaroak 26, barikua (19:30ean, Zabielen): Tartean Teatroaren Ez dok ero. 16 urtetik aurrerakoei zuzendutako emanaldia. Iraupena: 80 minutu.
- Azaroak 28, domeka (18:00etan, Zabielen): Futbolariak eta printzesak. 5 eta 12 urte bitartekoei zuzendutako emanaldia. Iraupena: 50 minutu.