2022an hasiko da martxan Mutrikuko Emakumeentzako Jabekuntza Eskola
Egitasmoaren helburua da emakumeen jabetze edo ahalduntze prozesuan eragitea. 'Haztera goaz, zu bazatoz?' izenburupean egindako jardunaldi feministetan erein zuten hazia.
Errealite bihurtzear dago Lotune izeneko Mutrikuko Emakumeentzako Jabekuntza Eskola. Egitasmoa 2022an hasiko da martxan, baina aurretik proiektua aurkeztu dute jendaurrean. Astelehenean [azaroak 15] udaletxeko areto nagusian egindako aurkezpenean azpimarratutakoaren arabera, proiektu anitza izango da; adin, klase, arraza, sinismen, aukera sexual edo errealitate ezberdinak dituzten emakume mutrikuarrei zuzendutako espazioa eta elkargunea izango da Lotune.
Egitasmoaren helburua da emakumeen jabetze edo ahalduntze prozesuan eragitea. Horregatik, emakumeak elkartzeko espazio bihurtzea nahi dute Lotune, “esperientziak elkarren artean partekatzeko eta elkartasun eta trukerako sareak sortzeko”. Gaineratu dutenez, hausnarketarako eta formaziorako topagunea ere izango da, “herriko emakumeentzako eta borroka feministarako aterpea. Emakumeok gure eskubideen jabe egiteko, gure bizitzetan autonomia eta konfiantza izateko eta beste emakumeekin sareak sortzeko espazioa izango da”.
Lotune Mutrikuko Emakumeentzako Jabekuntza Eskolaren aurkezpen ekitaldia. Argazkia: Mutrikuko Udala.
Iragarri dutenez, hiru hilabetetik behin batuko den talde motoreak erabakiko du modu parte hartzailean Lotuneren programazioa. “Bertan proposatu eta erabakiko dira hiruhilabetean eskolan egingo diren jarduerak. Talde irekia eta dinamikoa izatea da helburua eta, horregatik, deialdi irekiak egingo dira bertan parte hartzeko. Herriko emakume guztientzako lekua egotea nahi dugulako, programazioaren diseinua erabakitzeko orduan ere hala izatea nahi dugu”.
Asanblada irekietan adin, interes, lanbide eta sentsibilitate ezberdineko hogei bat emakumek parte hartu dute
Beste hainbat herriren esperientziari jarraituz, Mutrikun ere Jabekuntza Eskola bat sortzeko bideari hasiera eman zion udalak. Feminismo Batzordearekin elkarlanean Udal Feminismo Sailak 2021eko martxoan Haztera goaz, zu bazatoz? izenburupean egindako jardunaldi feministetan erein zuten hazia. “Jardunaldiak Jabekuntza Eskolaren sortze kolektiboa irudikatzeko lehen pausoa izan ziren. Hiru egun haietako indarrari lekukoa hartuta, Mutrikuko Jabekuntza Eskola amesteari ekin zitzaion”.
Ildo horretatik, emakumeentzako asanblada irekiak egin dituzte azken hilabeteotan. Besteak beste, honakoak landu dituzte asanblada irekietan parte hartu duten adin, interes, lanbide eta sentsibilitate ezberdineko hogei bat emakumek: Jabekuntza Eskolaren helburuak eta ezaugarriak eta eskolaren ardatzak zeintzuk izango diren, formazio feministaren baitan zein eduki landu nahi diren eta herrian ikusten dituzten beharrak, espazioa, izena eta antolaketa eta funtziomendua.
