Basogintza ereduari buruzko mahai-inguruan batuko dira Munitibarren
Bariku arratsaldean [azaroak 26] egingo dute saioa, udal aretoan. Hizlariak ondokoak izango dira: Aitor Onaindia Basoa Fundazioaren kidea, Jon Hidalgo Lurgaia Fundazioko kidea eta Iñaki Aizpuru Itsasondoko alkatea.
Udalaren ekimenez, basogintza ereduaz berba egiteko mahai-ingurua antolatu dute Munitibarren barikurako [azaroak 26]; saioa 19:30ean hasiko da, udal aretoan.
Hitzaldiaren helburua basogintzaren ikuspuntu ezberdinen arteko eztabaida eragitea da, basogintzan egon daitezkeen ikuspuntu ezberdinak entzunda. Horretarako, lehendabizi, Basoa Fundazioko Aitor Onaindiak, Lurgaia fundazioako Jon Hidalgok eta Iñaki Aizpuru Itsasondoko alkateak basogintzaz euren ikuspuntuak azalduko dituzte. Ostean, entzundakoez eztabaida zabalduko dute, bertaratutakoek ere parte har dezaten.
“Udalaren asmoa da eztabaidaren bidez, basogintzan oinarri izan daitezkeen klabe ezberdinak lantzea, eta ikusgarri egitea basogintza aurki daitezkeen ikuspuntu ezberdinak”, azaldu dute. Hain zuzen ere, basogintzan dihardutenek har ditzaketen erabakiak, eta ondorioak hobeto ulertzeko barikuko saioa baliagarria izatea nahi dute, eta era berean, Muntibarko Udaletik bultzatu beharreko politikak zehazteko lagungarria izatea ere espero dute.
