Beste bi bikote sailkatu dira Master Goxuaren finalerdietarako
Lau partida jokatu ziren zapatuan [azaroak 27]. Guztira, bederatzi partida falta dira jokatzeko.
Beste bi bikote sailkatu dira asteburu honetan Master Goxua Txapelketaren finalaurrekoetarako. Varelak eta Unanuek lehen mailan eta Igor Jaiok eta Aitxuluak bigarrenean lortu dute azken txanparako txartela.
Guztira, lau partida jokatu ziren zapatuan [azaroak 27]. Goizean, Lorenzo-Larin eta Beraikua-Bikandiren arteko norgehiagoka egon zen, eta 18-9 irabazi zuten Bereikuak eta Bikandik. Arratsaldean, berriz, Igor Jaiok eta Aitxuluak 18 eta 12 irabazi zieten Gandixa eta Goratzi lehenengo partida, Varela eta Unanue nagusitu ziren bigarrenean Madariaga eta Malaxi 18-9 irabaziz, eta azken lehian, Balserak eta Subillak lau tantoko aldeagaz irabazi zieten Gomezi eta Zubiriari (18-14).
Martitzenean [azaroak 30] hasita jokatzen hasiko dira bikoteak aste honetako partidak. Ia egunero egongo da norgehiagokaren bat Pello Urionabarrenetxea Markina-Xemeingo Esku Pilota Taldeko entrenatzaileak esan duenez. “Atzeratutakoak, kontuan hartuta, guztira bederatzi partida falta dira jokatzeko, eta abenduaren 6an eta agian 8an ere jokatuko da bateren bat”. Beraz, azken momentura arte ez da jakingo zeintzuk bikote egongo diren abenduaren 11ko finalaurrekoetan. “Lehen mailako bi partida eta bigarren mailako beste bi jokatuko dira, eta egun horretarako dena erabakita egon behar da”.
Oraingoz, Gisasola eta Zalduegi mallabitarrak (2. maila), Soraluzeko Varela eta Unanue (1. maila) eta Jaio aulestiarra eta Aitxulua etxebarritarra (2. maila) daude sailkatuta.
