Hogei mintzatalde daude martxan Lea-Artibai, Mutriku eta Busturialdean
Aspalditik daude martxan Gernika-Lumo, Markina-Xemein, Bermeo eta Ondarroakoak eta berriak abiarazi dituzte Busturian eta Elantxoben. Hainbat ekintza egiten dituzte euskaraz.
Euskaldun zaharrak, berriak eta euskara ikasteko eta erabiltzeko gogoa daukatenak batzea eta euren artean euskararen erabilera bultzatzea dira Berbalagun egitasmoaren helburu nagusiak; azken batean, helburua herritar orori euskaraz bizitzeko aukera eskaintzea eta euskararen presentzia kaleetan eta gizartean areagotzea. Proiektuaren ekimen nagusia Mintzataldeak dira. Talde horiek, besteak beste, kultur ekitaldiak, irteerak, afariak eta beste hainbat ekimen egiten dituzte batera, euskaraz.
Gernika-Lumon, Bermeon, Busturian, Elantxoben, Markina-Xemeinen, Ondarroan eta Mutrikun daude Berbalagunak. Denetara, hogei talde daude martxan.
2004an abiarazi zuten Gernika-Lumoko AEK-k, udal euskaltegiak eta udalak Berbalagun egitasmoa. Euskaraz berbetako talde presentzialak sortzeaz gain, bestelako egitasmoak sortzeko asmoa ere bazeukaten. Hala, 2004-2005 ikasturtean egin zuten lehenengoz Ezetz Jakin lehiaketa. Horrez gain, beste hainbat dira Berbalagunek ikasturtean antolatzen dituen ekintzak: Mintzataldeak, mendi irteerak, hitzaldiak eta Euskararen Eguneko 11 orduko irakurtaldia, besteak beste. Mintzataldeei dagokienez, gaur gaurkoz, sei dira osatutako taldeak, baina gehiago izatea espero dute. Talde horietara jende gaztea hurreratzea dute erronka.
Busturian ere talde bat sortu dute, eta barikuro batzen dira 10:30etik 11:30era, Axpeko tren geltokiaren aurrean, elkarregaz euskaraz egin eta paseatzeko. Bermeon, berriz, lau talde dituzte martxan, horietako batzuetan bizkaieraz berba egiten dute eta beste batzuetan, berriz, euskara batuan. Astelehenetan 18:30etik 19:30era Gizarte eta Kultura Etxean eta barikuetan 17:00etatik 18:00etara Lameran elkartzen diren taldeek bizkaieraz jarduten dute. Eguaztenetan 12:30etik 13:30era eta barikuetan 16:00etatik 17:00etara elkartzen direnek, ostera, batuaz.
Elantxoben ere taldea sortu dute aurten, udalaren ekimenez, eta barikuro elkartuko dira 10:00etatik 11:00etara portuan. Parte hartzea doakoa da, eta herritarrei «euskaragaz ausartzeko» gonbidapena luzatu diete. Euskaraz berba egiten duten bitartean, kafe bat edota paseotxo bat ematea da barikuko plana.
Lau talde daude Ondarroan eta hiru Markina-Xemeinen. Lekeition, koronabirusa dela eta, geldik egon dira, baina laster martxan hasteko asmoa daukate. Mutrikun lau lagun batzen dira astero. Mintzalagun taldearekin hasi eta dagoeneko kuadrilla bihurtu direla diote.
Mintzataldeetan parte hartu nahi dutenek ateak zabalik dituzte. Udalerrietako AEKn edo udal euskaltegietan izena eman daiteke.
