Leire Bilbaok irabazi du Lauaxeta Poesia Saria
Idazle ondarrutarra Bilboko Elkarte Filarmonikoan ospatutako ekitaldian izan da gaur saria jasotzen. 'Etxeko urak' lanagatik eman diote saria, 35 urtetik gorakoen kategorian.
Bizkaiko Foro Aldundiak XVII. Lauaxeta Sariak banatu ditu gaur [abenduak 2], Bilboko Elkarte Filarmonikoan ospatutako ekitaldi berezian. Euskararen normalizazioan eta sustapenean dabiltzan norbanako eta eragileei egiten duten lana aitortzea da sarien helburua, eta horien barruan, poesia arlokoak ere banatu dituzte, “idazle gazteen artean poesiagintza suspertzeko eta zabaltzeko asmoz”. 35 urtetik gorakoen kategorian Leire Bilbao ondarrutarra saritu dute; Etxeko urak poema liburuagatik jaso du saria.
Epaimahaiak aho batez erabaki du irabazlea, eta honakoa nabarmendu du. “Idazleak maisuki darabil hizkera poetikoa sinbolo horiek bereak egiteko eta bere hizkera propioz ernaltzeko eta emateko. Zuzena da bere diskurtsoa, batua bere mezuan, eta irakurlearengana oztoporik barik iristen da. Paralelismoak eta identifikazioak maite ditu, eta bere mezuaren eta itsasoko esanahaien arteko zubia erraz eraikitzen du amatasunari buruzko liburu honetan”. 35 urtetik beherakoen kategorian, berriz, Jon Ander Urkiaga saritu dute, Bizi min poema-bildumagatik.
Lauaxeta sarietan aitortuak izan direnak, tartean, Leire Bilbao ondarrutarra. Argazkia: Bizkaiko Foru Aldundia.
Lauaxeta Ikus-entzunezkoen 2021 saria, ostera, Iñaki Alforja eta Ivan Toledo zuzendariek jaso dute, Bolante baten historia lanagatik. Iaz, pandemia dela eta, aldundiak ez zuen Ohorezko saririk banatu. Aurten, horregatik, bi sari banatu dituzte. 2020 saria Xabier Amurizari eman diote eta 2021ko saria, ostera, Bizkaiko Euskarazko Musika Sortzaileei eman diete. Musikari horietako lagin bat saritu dute, honakoak, zehazki: Gontzal Mendibil, Mikel Urdangarin, Zea Mays eta Gatibu.
Bilboko Elkarte Filarmonikoan ospatutako ekitaldi berezian, gainera, ondarrutar birek ere parte hartu dute. Garazi Etxaburuk dantzan egin du eta Kirmen Uribek errezitaldia eskaini du.
