Ziurtagiriaren derrigortasuna beste esparru batzuetara zabaltzea aztertzen ari da Jaurlaritza
Ohartarazi dute COVID ziurtagiria eskatzeko neurria gaur [abenduak 2] sartu daitekeela indarrean. Zehaztapen gehiago egin arte, gaueko aisialdian eta 50 bezero baino gehiago hartzen dituzten ostatuetan izango da beharrezkoa.
Espainiako Auzitegi Gorenak COVID ziurtagiriari buruz erabakitakoa ofizialki jakinarazten duenean, haren erabilera ezartuko du Eusko Jaurlaritzak; ohartarazi dute gaur [abenduak 2] sartu daitekeela neurria indarrean. Indarrean sartzeaz batera, gaueko aisialdian eta 50 bezero baino gehiago hartzen dituzten ostatuetan eskatzen hasi beharko da. Dena dela, Iñigo Urkulluk esan du aztertzen ari direla derrigortasun hori beste esparru batzuetara ere zabaltzea.
Egin dituen adierazpenetan ez du argitu zein jarduera eremu dituzten buruan. Hala ere, onartu du, hori egin ahal izateko, proposamena berriro auzitegiei helarazi beharko lieketela. Ziurtagiriari emango dioten lehen erabilerarako, EAEko Justizia Auzitegi Nagusira jo zuten lehendabizi onespen eske, eta han ezezkoa jaso ostean, Gorenaren baietzarekin egin ahal izango dute orain aurrera.
Datuak nabarmen okerrera egiten ari direla ohartarazita, bestalde, neurri gehiago ere espero dira datozen orduetan. Martitzenean [abenduak 2] Gotzone Sagardui Osasun sailburuak aurreratu zuen osasun larrialdi egoera ezarriko dutela berriro; Gorenaren sententziaren zain daude pauso hori emateko ere. Lehendakariak azaldu duenez berriz martxan jarriko dute pandemiaren aurkako neurriak ezartzen dituen Labi batzordea; ustez barikuan [abenduak 3] iragarriko dute neurri murriztaile berriak.
