"Basakeria kapitalista" salatzeko mobilizazioa deitu du Lea-Artibaiko Kontseilu Sozialistak
Kapitalismoari aurre egiteko antolakuntza komunista aldarrikatuko dute abenduaren 30ean 19:00etan Lekeitioko plazatik hasiko den manifestazioan. Lea-Artibaiko langileria mobilizazioan parte hartzera deitu dute.
Lea-Artibaiko Kontseilu Sozialistako kideak, abenduaren 30erako deialdia egiten. Argazkia: Lea-Artibaiko Kontseilu Sozialista Salatu dute aurten 59 langile hil direla Hego Euskal Herrian, eta horietatik hiru Lea-Artibaikoak direla. “Horiek guztiak ez dira istripuak edo berezko heriotzak. Lan erailketak dira. Kapitalismoaren basakeriak ez dauka etenik”. Horri aurre egiteko, “osotasun kapitalistari aurre egiteko” indarrak eraikitzen hastera deitu dute. Bide horretan, Lea-Artibaiko langileriari abenduaren 30ean 19:00etan Lekeitioko plazatik hasiko den manifestazioan parte hartzeko deia egin diete.
Kapitalismoaren “egiturazko biolentziak” langileen bizitza “goitik behera” zeharkatzen duela diote. Izan ere, langileak kapitalaren akumulazioarako pieza soilak direla diote. “Ez bakarrik lantokian gaudenean. Burgesiaren boterea elikatzeko pieza hutsak gara”. Hala, langileen bizitzak “burgesiaren interesen arabera” antolatzen direla diote. “Kapitalismoak bere boterea elikatzeko beharrezkoa den dominazio ekonomiko, politiko eta kulturala ezartzen du”.
Hala, langilegoaren bizitza “soldatapeko lanaren menpekoa” dela diote. “Langilea akumulazio behar etengabeak exijitzen dituen produkzio baldintzetara egokitu behar da sistema kapitalista funzionala izan dadin. Horrela, urtero milaka langilek euren bizitza galtzen dute kapitalaren zerbitzura”. Hildako langileen kopurua ezin dela asimilatu diote. “Kapitalismoa izatez “biolentoa eta hiltzailea” dela gaineratu dute. “Horregatik, ezin daiteke baldintzen hobekuntza batean kokatu auziaren ebazpena”.
Beraz, abenduaren 30eko mobilizazioan lan erailketak eta horien “izaera estrukturala” salatzeaz gain, antolakuntza komunistaren aldarria lau haizetara zabalduko dutela esan dute. “Basakeria hau betikotu ez dadin, aukera bakarra daukagu: sozialismoaren bidetik, klase sozialik gabeko gizarte batera bidean antolakuntza komunista da egin dezakegun hautu errealista bakarra”. Bide hori, errealitate “miserable” horrekin errotik apurtzeko “benetako eraldaketarako” aukera bakarra dela diote.
