Erabakita daude Master Goxuako finalaurrekoak
Guztira, zortzi bikote ariko dira zein baino zein gehiago datorren asteko finalera igaro nahian. Zapatuan [abenduak 11] jokatuko dira finalaurrekoak Markina-Xemeingo frontoi txikian.
Zapatuan [abenduak 11] jokatuko dira Master Goxua Txapelketako finalaurrekoak Markina-Xemeingo frontoi txikian. Guztira, zortzi bikote ariko dira zein baino zein gehiago datorren asteko finalera igaro nahian, lau 1. mailan eta beste lau 2. mailan.
Finalista gehienak joan den asteburuan erabaki ziren, eta falta zena astelehenean [abenduak 6] Atano-Martzel eta Berasaluze-Malax bikoteek jokatu zuten partidan erabaki zen. Horrela, ondorengoak izango dira finalaurrekoetan egongo diren bikoteak.
- 2. mailan: Igor Jaio-Aitxulua, Onagoitia-Arrate, Gisasola-Zalduegi eta Laka-Eritz.
- 1. mailan: Varela-Unanue, Iñaki-Legarra, Eneko-Ube eta Berasaluze-Malax.
Finalaurrekoetako lau partidak jokatuko dira zapatuan 16:30ean hasita. Lehenengo partida Berasaluze-Malax eta Iñaki-Legarra bikoteen artekoa izango da; aurrez aurre aurkituko dira ondoren, Laka-Eritz eta Onagoitia-Arrate; jarraian Igor-Jaio-Aitxulua eta Gisasola-Zalduegi bikoteak neurtuko dira, eta azkenik, Ube-Eneko eta Varela-Unanueren artean erabakiko da zein igaroko den finalera.
Pello Urionabarrenetxea Markina-Xemeingo Esku Pilota Taldeko entrenatzaileak iragarri duenez, “lehiatuak” izango dira guztiak. “Maila ona dago eta partida politak irtengo dira”. Ikusleek norgehiagokak lasai-lasai ikusi ahal izateko aulkiak ere jarriko dituzte.
Bizkaikoa. Beste alde batetik, nagusien mailako Bizkaiko Kluben Arteko Txapelketako finalaurrekoa jokatuko da eguaztenean [abenduak 8] Lekeitioko Santi Brouard pilotalekuan. Markina-Xemeingo Esku Pilota taldeko bikotea eta Lea Ibarra Motrollo taldekoa neurtuko dira 12:00etan.
