Jose Ramon Txopitearen argazkiak jaso du Mendexako argazki lehiaketako sari nagusia
Txopitearen 'Leagi dorrea' argazkia izan da epaimahaiari gehien gustatu zaiona. Bigarren saria Idoia Gimenez Larreak lortu du, eta hirugarrena Luzio Lakak. Sariak abenduaren 25ean banatuko dituzte.
Leixarra Elkarteak eta Mendexako Udalak antolatu duten udal egutegia osatzeko Argazki Lehiaketan Jose Ramon Txopitearen Leagi dorrea argazkia saritu du epaimahaiak. Iaz ere lehenengo bi sariak jaso zituen Txopiteak. Bigarren saria Idoia Gimenez Larrearen Aulkiak beren bakardadean argazkiarentzat izan da, eta hirugarrena Luzio Lakaren Santa Luzia argazkiarentzat.
‘Leagi dorrea’ argazkia. Argazkia: Jose Ramon Txopitea.
Mendexako eraikinek eta elementu arkitektonikoek osatuko dute 2022ko udal egutegia, horixe izan baita aurtengo gaia. Bederatzi parte hartzaile egon dira, eta 23 argazki aurkeztu dituzte. Horien artean zazpi aukeratuko dituzte; bata egutegiaren azala izango da, eta beste seirak hilabeteentzat–orrialde bakoitzean bi hilabete egongo dira–.
Abenduaren 25ean banatuko dituzte sariak, Leixarra Elkarteak urtero egin ohi duen argazki zaharren erakusketan, eta Argazki Txapelketara aurkeztutako argazki denak ere ipiniko dituzte ikusgai.
Aurrekoetan baino parte hartze baxuagoa eduki dute oraingoan. Esate baterako, iaz hamasei pertsonen 42 argazkiren artean egin zuten aukeraketa. “Ez dakigu ondo zein izan den arrazoia, baina aurten parte hartzaile gutxiago egon da. Egia da egoera apur bat berezia izan dela. Pentsatzen dugu, agian, jendeari gaia konplikatuagoa iruditu zaiola, edota aurreko urtekoa baino apur bat gaitzagoa izan dela. Hala ere, argazki kopurua ez da asko jaitsi; gehienez hiru aurkeztu ahal zituen bakoitzak, eta batzuek gehienezko kopurua aurkeztu dute”, azaldu dute antolatzaileek.
Datorren urteko lehiaketan parte hartzera animatu dituzte herritarrak. “Jendea animatzea nahi dugu. Gauza pila bat ikasten ari gara. Gure herria berdeskubritzen ari gara; batzuek ezagutzen ez genituen txoko eta bazter batzuk agertzen dira. Aurten ere gertatu zaigu hori, eta harrituta geratu gara. Ondarea eta gure herria ondo ezagutzeko aukera ematen du. Era berean, denon artean eginda, egutegia herrikoiagoa izateko lehiaketa da. Gaia aurkezterako orduan datorren urtean bueltatxo bat eman beharko diogu, eta agian, gaia zabalagoa izan beharko da”.
