Itsas hondakinek sortzen dituzten kalteei buruzko hitzaldia emango dute Ondarroan
Oihane Cabezas Basurko Aztiko ingurumen ikerlariak berbaldia emango du astelehenean [abenduak 13], 18:30ean, Beikozinin.
Ondarroako Zientziaren Giltzak elkarteak antolatuta, itsas hondakinek eta batez ere plastiko hondakinek sortzen dituzten kalteei buruzko Plastic wars: itsas hondakinen isilpeko mehatxua berbaldia emango dute astelehenean [abenduak 13], 18:30ean, Ondarroako Beikozinin. Antolatzaileek Oihane Cabezas Basurko Aztiko ingurumen ikerlaria gonbidatu dute berbaldia emateko.
Ohartarazi dutenez, aforo mugatua egongo da eta COVID-19aren aurkako neurriak zorrotz beteko dira. Nahitaez COVID ziurtagiria erakutsi beharko da aretoan sartzeko, maskara soinean eramatea ere derrigorrezkoa izango da eta mahaiak eta aulkiak ezingo dira mugitu. Bertaratu ezin dutenek antolatzaileen YouTube kanaletik jarraitu ere ahal izango dute zuzenekoa.
Adituen arabera urtero 10 milioi tona plastiko iristen dira itsaso eta ozeanoetara
Zehaztu dutenez, Euskal Herrian itsas hondakinen egoera zer nolakoa den azalduko du gonbidatuak. “Itsas hondakinei buruzko mantra ezberdinak argituko ditugu, esaten diren adierazpenak egiaztatu eta baztertuz. Tokian eta mundu mailan bultzatzen ari diren aurrerakuntzak aztertuko ditugu eta gizarteak mehatxu honi aurre egiteko aukera batzuk ere proposatuko ditugu”.
Plastikoa nonahi dagoela eta itsas hondakinak munduko itsaso eta ozeano guztietara ailegatu direla gaineratu dute, Kantauri itsasotik hasita Artikoa bezalako toki isolatuetaraino. “Adituen arabera urtero 10 milioi tona plastiko iristen dira gure itsaso eta ozeanoetara. Egoera hain da kezkagarria, non itsas hondakinak ozeanoentzako mehatxu berritzat izendatu dituztela mundu mailako ikerlariek, eta ondorioz, maila guztietako politika eta gobernu agendetan sartu dira”.
Hizlariaren ibilbidea. Cabezas ingurumen ikerlaria eta itsas hondakinen inguruko azterketan lan egiten du Aztin, 2010az geroztik; arrantzak, akuikulturak eta itsas garraioak sortzen duten itsas hondakin eta energia aztarnaren inguruan lan egiten du. Horrez gain, itsas hondakinek Bizkaiko golkoan duten presentzia ikertu du beraien ugaritasuna, iturria, jatorria eta garraioa aztertuz, itsas hondakinak monitorizatzeko eta kudeatzeko tresna eta teknologia ezberdinen garapenetan parte hartu du.
