Artibai Judo Taldekoek emaitzak onak lortu dituzte kadete mailako IX. Espainiako Kopan
Zazpi judokak parte hartu dute txapelketan; Laia Rios mutrikuarrak eta Haritz Bernedo ondarrutarrak lortu dituzte emaitzarik azpimarragarrienak.
Zapatuan [abenduak 11] Iruñean jokatu zen kadete mailako IX. Espainiako Kopan parte hartu zuten Ondarroako Artibai Judo Taldekoek. Luis Ferreño taldeko arduradunak zehaztu eman duenez, zazpi judokak parte hartu zuten Nafarroako Unibertsitate Publikoko kiroldegian lehiatu zen txapelketan. Pozik agertu da txapelketan lortutako emaitzekin. “Talde moduan egindako lanagaz gustura geratu gara; esperientzia oso ona izan da taldearentzat. Dominarik ez dugu eskuratu, baina nahikoa borrokaldi irabazi genituen”.
Ferreñok gaineratu du askorentzat kadete mailan lehiatutako lehen txapelketa izan dela. “Laia Riosentzat, Naia Peñarentzat, Oier Lagorentzat eta Manex Basurkorentzat maila horretan eduki duten lehen esperientzia izan da. Danel Irusta eta Eñaut eta Haritz Bernedo anaiek, ostera, urtebete daramate maila horretan lehiatzen”.
Asteburuko proban parte hartu duten zazpi kirolariak. Argazkia: Artibai Judo Taldea.
Emaitzei dagokienez, Laia Rios mutrikuarrak eta Haritz Bernedo ondarrutarrak lortu zituzten emaitzarik azpimarragarrienak. Riosek bosgarren postua erdietsi zuen 57 kiloz azpiko kategorian eta Bernedok, berriz, zazpigarrena 55 kiloz azpikoan.
Iruñekoa Espainiako Kopako azken proba izan dela esan du Artibai Judo Taldeko arduradunak. “Orain atseden hartzea dagokigu. Urtea hasteagaz batera, berriz, datorren urtean ditugun txapelketekin pentsatzen hasiko gara. Datorren urtean bertan behera gelditzen ez badira behintzat, Espainiako Kopako zazpi proba jokatuko dira. Tenerifekora izan ezik, penintsulan egingo diren guztietara aurkezteko asmoa daukagu”.
