Urteko kirolari "nabarmenenak" omenduko dituzte Mutrikuko IX. Kirol Galan
Sari banaketa ekitaldia barikuan [abenduak 17] 19:00etan egingo dute Zabiel kultur etxeko hitzaldi aretoan. Gala Internet bidez ikusteko aukera edukiko dute bertaratu ezin dutenek.
Bederatzigarren urtez jarraian, herriko kirolari zein talde “nabarmenenei merezitako omenaldia” egingo diete Mutrikuko Udalak, udal kirol zerbitzuak, Kirol Batzordeak eta Kirol Lan Mahaiak elkarlanean antolatu dute Kirol Galan. Ekitaldia, barikuan [abenduak 17] 19:00etan egingo dute, baina berritasun modura, udaletxean egin beharrean Zabiel kultur etxeko hitzaldi aretoan egingo dutela esan dute antolatzaileek. “Estreinako hantxe batzea erabaki dugu. Aforo aldetik aukera gehiago ematen digulako aukeratu dugu tokia. Proiektorea ere bertan daukagu, eta irabazleei buruzko ikus-entzunezkoak proiektatzeko orduan ere erosoago ibiliko gara”.
Ordubete inguruko iraupena edukiko du ekitaldiak, eta, ohi modura, lau sari banatuko dituzte: Kirolari Onena, Kirol Talde Onena, Kirol Ibilbide Onena eta Kirol Aipamen Berezia. Emozioari azken uneraino eusteko, ez dute aurreratuko zeintzuk izango diren aurtengo irabazleak. “Ekitaldiarekin kirol munduan dabiltzan eta ibili diren pertsona edo eragileei aitortza egin eta eskerrak eman nahi dizkiegu. Sari bakoitzerako hainbat hautagai egon dira, baina batzordean erabaki da irabazleak zeintzuk izango diren. Horien izenak ekitaldian bertan ezagutaraziko dira”.
Ekitaldia irekia izango da, eta COVID-19aren aurkako osasun egoeragatik ezarritako protokoloa zorrotz beteko dutela esan dute. “Ezingo da ezarrita dagoen muga gainditu. Horrez gain, musukoa erabili beharko da nahitaez eta aretoan sartzerakoan ere eskuak desinfektatu beharko dira”. Bertaratu ezin dutenek ekitaldi osoa Internet bidez ikusteko aukera izango dutela ere gaineratu dute. “Gala guztia grabatuko egingo dugu. Zalantza daukaguna da zuzenean bota ahalko dugun ala ez. Ziuraski hurrengo egunetik aurrera ikusgai egongo da sarean”.
