COVID ziurtagiriaren "inposaketaren" aurka egiteko Donostian egingo den manifestaziora joateko dei egin dute
Manifestazioa zapatuan [abenduak 18] egingo da, Bizitza plataformak deituta; 17:00etan Bulebarretik hasiko da. Aulestin ere ziurtagiria eskatzeko derrigortasunaren aurka mobilizatu dira –argazkian–.
COVID ziurtagiria “lotsaren ziurtagiria” dela eta zapatuko mobilizazioa giza eskubide unibertsaletan “atzerapausorik ez emateko eta horien urraketari aurre egiteko” deitu dutela esan du Bizitza plataformak. Lea-Artibai eta Mutrikuko herritarrei ere mobilizazioan parte hartzeko deia egin diete, “masa kritiko eta erraldoia” sortzeko. Oro har, “ziurtagiriaren inposaketari eta kontrolatzeko eta baztertzeko sasiosasun diktadura berriari” kontra egiteko mobilizatuko dira.
Agintariak “gezurretan” ari direla diote. “Esan ziguten txertoa deitzen dioten baina sendagai genikoa den horrekin dena konponduko zela. Bi dosirekin dena normaltasunera itzuliko zela. Orain esaten digute maskarekin jarraitu behar dugula, 6 hilean behin ziztatzen jarraitu behar dugula. Baina hasi dira esaten hiru hilean behin inokulatu beharko garela. Eta gero zer esango digute? Hilero ziztatu beharko gaituztela?Zertarako balio izan du honek guztiak? Farmazialariak izugarri aberats bihurtzeko?”.
“Mundu mailan Zainketa Intentsiboetan dauden %75etik gora txertoa hartu dutenak dira. Euskal Herrian datu hori ezkutatzen ari dira”
Gaineratu dute herritarrek “fede onez” sinetsi dituztela esandakoak, baina txertoa jarritu dutenak Zainketa Intentsiboetara joaten eta hiltzen jarraitzen dutela diote. “Mundu mailan Zainketa Intentsiboetan dauden %75etik gora txertoa hartu dutenak dira. Euskal Herrian datu hori ezkutatzen ari dira”. Gainera, sortu diren birusaren aldaeren aurrean txertoen eraginkortasuna galdu dela diote. “Prestigioko zenbait aldizkariren arabera, inokulatutako pertsonek inokulatu ez direnek beste edo gehiago kutsatzen dute”. Diotenez, iaz, txertorik gabe, garai hauetan ez zegoen hainbeste positibo: “Ez genuen hainbeste jende Intentsiboetan sartuta eta ez zen hainbeste jende hiltzen”.
Gainera, ziurtagiria eskatzeko derrigortasuna Espainiako Konstituzioaren aurkakoa dela eta ostalaritza, kulturgintza, autonomo eta enpresa txikiak kaltetzen dituela mahairatu dute. “Baztertzailea izateaz gain, hainbat naziorteko lege eta hitzarmen urratzen ditu eta epe laburrera gizartea erabat kontrolatzeko abiapuntua da”.
