Mutrikuko Iratxo Ludotekak ate irekien jardunaldiak egingo ditu
Zerbitzuaren funtzionamendua ezagutzera emateko ate irekien jardunaldiak astelehenetik [urtarrilak 31] eguaztenera [otsailak 2] egingo dituzte.
Otsailetik ekainera seme-alabak ludotekara bidali nahi dituzten gurasoek izena emateko aukera zabalik daukate. Izen emate orriak ludotekan bertan edo udalaren webgunean daude eskuragarri. Otsailaren 3a da izen emate orriak bueltatzeko azken eguna; iratxoludoteka.mutriku@gmail.com posta elektronikora idatzita edo ludotekan bertan bueltatu daitezke izen emate orriak.
3 eta 12 urte bitarteko haur eta gaztetxoak parte hartu ahal izango dute antolatzen diren ekimenetan. Haur talde murriztuak izango direla esan dute, eta 45 minutuko edo ordubeteko saioak egingo dituztela. 3 eta 5 urte bitartekoak ludotekan batuko dira, eta hortik gorakoak, Gaztelekuan. Zerbitzua astelehenetik eguenera 16:00etatik 19:30era bitartean egongo da zabalik. Zehaztu dutenez, adin tarte bakoitzari ordu tarte bat egokituko diete. “Behin betiko ordutegia aurrerago zehaztuko da”.
