Markak hobetu dituzte Ondarroa Sarian parte hartu duten igerilari gehienek
Ondarroa Igeri Taldeak antolatuta, zapatuan [otsailak 19] lehiatu zuten proba, Zaldupe udal kiroldegiko igerilekuan. Iragarri modura, Ondarroa, Markina-Xemeingo Atxondo, Bermeoko Kikunbera eta Zallako Zurkide taldeetako eskolar mailako eta federatuko 100 igerilarik lehiatu zuten proba.
Antolatzaileek probari buruzko balorazio oso positiboa egin dute. “Egun guztian giro ona nagusi izan zen igerilekuan; polita izan zen neskak eta mutilak batera lehiatzen ikustea. Parte hartzaileek pozik eta gustura amaitu zuten; kantxan banatu genituen oroigarriak, eta han ere giro ona egon zen. Markei dagokienez, denetarik egon zen, baina, oro har, gehienek markak hobetzea lortu zuten”.
Uretara dzanga egiten lehenengoak federatuak izan ziren. 11 proba lehiatu zituzten: 50 metroko crawl errelebo probak (neskak eta mutilak), 100 metroko lasterketak (bular, bizkar, crawl, tximileta eta estiloetan) eta 50 metroko lasterketak (bular, bizkar, krol eta tximeleta). Eskolarren txanda izan zen gero. Zazpi proba lehiatu zituzten: 50 metroko errelebo proba mistoa estiloetan, 100 metroko lasterketak (crawl eta estiloak) eta 50 metroko lasterketak (bular, bizkar, krol eta tximeleta).
Arratsaldean, ohi modura, igeri eskolako gazteenek erakustaldia egin zuten, euren aurrerapenak erakusteko. Bi txandatan banatuta, 34 haurrek parte hartu zuten erakustaldian. Bakoitzak luze bat egin zuen crawl estiloan eta beste bat bizkar estiloan. Amaitzeko, errelebo proba bat ere egin zuten. “Dominak eta oroigarriak eman genizkien denei, eta poz-pozik amaitu zuten”.
