Iñaki Errastik eta Eneko Azkaratek 'Antiguako Ama' entrenatzen jarraituko dute 2023a arte
Arraunlari aginagarrak gizonezkoen trainerua entrenatuko du eta ondarrutarrak, berriz, emakumezkoena.
Ondarroa Arraun Elkarteak berri “pozgarria” eman du egunotan. 2022ko traineru denboraldia hasteko asko falta bada ere, 2023ko denboraldirako lehen harriak ipintzen hasi da kluba, eta nagusi mailako traineru bien entrenatzaileak zeintzuk izango diren jakitera eman du. Hain zuzen ere, 2023ra arte Iñaki Errastik eta Eneko Azkaratek proiektua hauspotzen jarraituko dutela esan du elkarteak sare sozialetan. “Eskerrik asko bioi proiektu honetan sinestearren! Denon artean lortuko dugu Ondarroako Arraun Elkartearen izena merezi duen lekuan ipintzea”.
Bi entrenatzaileekin beste urtebeterako konpromisoa berrestea “erraza” izan dela azaldu du Koldo Azpiazu presidenteak. “Bi entrenatzaileek egiten duten lanagaz oso pozik gaude, eta beste urtebetez jarraituko duten galdetu diegunean, baiezkoa eman digute. Entrenatzaileak ziurtatuta izango ditugula jakitea, egia esan, oso lasaigarria da denontzat”.
Errastik 2018tik darama Antiguako Ama entrenatzen eta bertan arraun egiten, Jon Iriondo ondarrutarrak ardura laga zuenetik, hain zuzen. Azkaraterentzako, ostera, aurtengoa izan da emakumezkoen trainerua entrenatuko duen lehen denboraldia. Nagore Osoro entrenatzailearen laguntzailea eta emakumeen prestatzaile fisikoa izan zen 2021 denboraldian. Horrez gain, hainbat urtez gizonezkoen traineruko arraunlaria ere izan da. “Iaz laga zuen arrauna”.
Bilera orokorra. Eguenean [martxoak 3], berriz, ohiko bilera orokorra egingo du elkarteak. 19:00etan, Kofradia Zaharrean batzeko deia egin diete bazkideei. Besteak beste, elkartearen kudeaketari dagokion 2021 urteko kontuen errepasoa, 2021 urteko kirol balantzea eta 2022ko aurrekontua onartu eta dituzten aurreikuspenen berri emango dute. Era berean, udan egingo duten hauteskundeei buruzko informazioa ere zabalduko dute. “Abuztuan amaituko dugu agintaldia, eta bateren batek hautagaitza aurkeztu nahi badu zer egin behar duen azalduko dugu”.
