Zinegoak jaialdia Lekeitioko Ikusgarri zinema aretora itzuliko da
Bilboko Gaylesbitrans nazioarteko zinema jaialdiko egoitzetako bat izango da eguen eta barikuan [martxoak 3 eta 4]
2020an abiatu zen Euskal Zine Bilera eta Zinegoak jaialdiaren arteko elkarlana pantaila irekia egitasmoaren barruan. Lekeitioko Udalaren laguntzagaz, jaialdiak aurten bi egun hartuko ditu Ikusgarri zinema aretoan. “LGTBI tematikadun filmeak eta sortzaileak ekarriz herriko kultur eskaintza aberasten da, eta zinema zirkuitu arruntetan ikusteko zailak diren lanei leiho bat zabaltzen zaie”, adierazi dute antolatzaileek. Sarrerek 3 euro balio dute eta salgai egongo dira egunean bertan aretoko leihatilan.
Martxoaren 3an 19:00etatik aurrera, Laura Samaniren Piccolo Corpo filma aurkeztuko dute. Ahizpatasuna, berrespena eta aitortza ditu ardatz, eta Bizkai, Araba eta Gipuzkoan lehen aldiz emango dute. Martxoaren 4ko jaialdia bi ataletan banatu dute. Film laburren eguna izango da.
Lehenengo saioan, begiradak izenpean, haurtzaroa eta nerabezaroaren inguruan jardungo dute, Aitor Gametxo zuzendariaren Berak Baleki laburmetraia proiektatuko dute. Zinemagile lekeitiarra Ikusgarri zinema aretora arte bertaratuko da, ikusleekin solasaldia egiteko aukera zabalduz.
Erroak bigarren saioan, Euskal panorama izango dute hizpide. Lau film labur aurkeztuko dituzte: Mel Arranzen Azaletik azalera, Xabier Vallinaren Ilunabarrean esan, Maider Garcia Merinoren No deberías eta Tamara Lucarini Cortesen Txango.
