Lekeitioko hiri antolamendua saritu du Euskal Herriko arkitektoen elkarteak
Herrian egiten ari den berrurbanizazio plana nabarmendu nahi izan du elkarteak, Hirigintza Planteamendua, hain zuzen ere.
Lekeitio berrurbanizazio lanetan dago buru-belarri. 2020ko azaroaren 12ko osoko bilkuran onartu zen aho batez Hiri antolamenduko Plan Orokorra (HAPO), hau da, herriko kale eta auzoek hurrengo urteetan izango duten bilakaeraren azalpena. Euskal Herriko arkitektoen elkarteak dokumentu hau saritu du, Hirigintza Planteamenduko sariagaz, hain zuzen ere. Epaimahaiak lanaren izaera operatibo nabarmendu nahi izan du, “udalerriko aukera-eremuak modu errealistan garatzeko aukera ematen baitu”.
Horrez gain, paisaia natural eta historiakoarekiko errespetua azpimarratu du arkitektoen elkarteak. Plan hau dagoeneko martxan dago eta helburua da datozen urteetan Lekeitioko udalerriaren lurzorua hirigintza-ikuspegitik bere osotasunean antolatzea plangintza-tresna honen bidez.
Bidea, ordea, luzea izan da. Udala 2016an hasi zen proiektu honekin eta lehendabizi herritarren iritziak, ekarpenak eta irtenbideak jaso nahi izan zituen, horrenbestez HAPO dokumentua herriko parte hartze prozesuaren emaitza da. Udalak nabarmendu nahi izan du proiektuaren ardatza “natura-ingurunea eta eraikitako ondarearen babesa” izan behar zirela. Gauzak horrela, gizartearen beharrizanak asetzera bideratuko diren hiri-garapenak lehenetsi dituzte, babes ofizialeko etxebizitzak, besteak beste.
2020an aho batez onartutako eta aurten saritutako Hiri antolamenduko Plan Orokor honek irizpide oso argiak ditu. Lurzoru-kontsumoaren arrazionalizazioa bilatzen du, egungo hiri-ehunaren garapenei lehentasuna ematea, hau da, kaskoa egitea joatea, hutsuneak betez eta ez garapen bakartuak garatuz. 310 etxebizitza hauetatik %49,24 Babes Publikokoak izango dira. Bide beretik, udalak 73.034,00 m2 lurzoru urbanizagarri ezabatu ditu, Santa Katalina eta San Antolin inguruan batez ere. Udalerriaren barne oinezkoen mugikortasuna sustatzea da beste helburu nagusietako bat, hiri-garapen eremu berrietan zein gaur egungo espazioetan, irisgarritasun hobea ziurtatuz.
