Bizkaiko Bertsolaritzaren jaia ospatuko da maiatzaren 28an, Larrabetzun
Goizean eskolarteko finalak jokatuko dira (idatzizkoa eta bat-batekoa) eta arratsaldean taldekako finalaurrekoak eta finala; bertan ariko dira Lea-Artibaiko Akerbeltzen Antxumak.
Zornotzako Bertso Oskolaren kontra neurtuko dira Lea-Artibaiko Akerbeltzen Antxumak maiatzaren 28an, Larrabetzuko kanporaketetan; gainontzeko taldeen artean zozketaz erabakiko dute ostera, hirugarren taldea. Taldekako finalaurrekoak 16:00etan hasiko dira. Lehenengo kanporaketa eskolan jokatuko da, beste biak berriz, kalean; 17:30ean, bigarrena, eta 19:00etan, azkena. Finala 22:00etan hasiko da, Hori Bai gaztetxean.
Bizkaiko Bertsozale Elkarteak esan duenez, bertso eskolen eta bertsozaleen jaia izango da maiatzaren 28a, eta horretarako, egun osoko egitaraua prestatu dute: goizean eskolarteko finalak egongo dira, lehenengo idatzizkoa eta ostean, bat-batekoa; eguerdian bazkari herrikoia egingo da, eta eguna borobiltzeko, arratsaldean, taldekako hiru finalaurrekoak eta finala jokatuko dira. Bestalde, egun osoan zehar trikitilariek lagunduko dute giroa alaitzen.
Zehaztu dutenez, bazkariko txartelak hartzeko azken eguna maiatzaren 19a izango da. Txartelak Bertsosarrerak atarian daude eskuragarri.
Eskolartekoa. Martxan dago baita ere, Bizkaiko bat-bateko eskolarteko txapelketa. Astelehenean [maiatzak 9] jokatu zen lehenengo kanporaketa Gernika-Lumoko Astran, eta zazpi gaztek parte hartu zuten bertan. Denen artean onena izan zen Jokin Ansotegi, eta Larrabetzun jokatuko den finalerako zuzeneko txartela eskuratu zuen.
Gernika-Lumoko kanporaketagaz gainera, beste bi lehiatuko dituzte Bizkaiko bertsolari gazteek, hurrengoa maiatzaren 16an, 17:00etan hasita, Bilboko Euskararen Etxean, eta azkenengo saioa maiatzaren 18an izango da, Durangoko Kurutziaga Ikastolan, 17:00etan. Bi horien ondoren, erabakita geratuko dira Ansotegigaz batera nortzuk ariko diren finalean.
Eskolarteko idatzizkoan, bestalde, Bizkaia osoko 150 gaztetxo inguru batuko dira, eta ordu bete inguru izango dute proposatutako ariketak egiteko Larrabetzuko eskolan. Gaztetxoak 5 mailatan egongo dira banatuta: 5. Maila, 6. Maila, DBH 1, DBH 2 , DBH 3 eta Batxilergoa.
