Museo bat aire zabalean, Kamiñazpin
Informazio hitzaldia egingo da maiatzaren 12an [eguena], 22:00etan, Kamiñazpi 31 eta 33 atarien arteko plazan. Proiektuari buruzko azalpenak emateaz gain, proiekzio txiki bat egingo da.
Ondarroako Udalak nazioarteko proiektu artistiko bat egiteko proposamena jaso du. Mundu mailan bere lanengatik ezaguna den Lian muralgileak bere obra Ondarroan ere zabaldu nahi du, eta horregatik Kamiñazpi auzoa aukeratu du.
Hortaz, Ondarroako Udalak proiektua baloratu ostean, auzoko herritarrei proposamena luzatu nahi die. “Kamiñazpi auzoa hobetzeko, Ondarroa mundu artistikoan nabarmentzeko eta publiko zabalagoa erakartzeko, auzoko pareta ezberdinetan horma-irudiak egitea proposatzea erabaki zen”. 2022. urtean mural batekin hastea da asmoa, Lian (Murales Lian) nazioarteko muralgile ospetsuaren eskutik.
Lehenengo urratsa emanik, hurrengo urteetan, Ondarroako kultura, historia, hizkuntza eta eguneroko bizitzan murgildutako nazioarteko sortzaileekin “egoitza artistiko” bat antolatu ahal izatea da asmoa, Kamiñazpi auzoan hainbat horma-irudi sortu, artisten esperientzian oinarrituta.
“Museo bat aire zabalean” proiektuari dagokionez, lehen informazioa eskuragarri jarri du udalak, informazio hitzaldira hurbildu nahi duen orok, aldez aurretik, nondik norakoak jakin dezan.
“Kamiñazpi beste begi batzuekin begiratzean, muralista baten begiekin, hormak mihise bihurtzen dira, eta bere kale estuak aire zabaleko museo erraldoi bateko korridore bilakatzen dira, non jendeak kaleko arteaz gozatu dezakeen”.
- Nola burutuko da?
Nazioartean ezaguna den Lian (MuralesLian) muragilearen esku-hartze artistikoarekin: artista hau mundu osoko hormak apaintzen ari baita bere lanekin.
Lanak ikusteko aukera dago esteka honen bitartez Lian
- Non egingo da?
Kamiñazpi auzoko horma batean. Bertako komunitate ezberdinei aukera emango zaie haien horma margotzeko. Komunitate batek baino gehiagok nahi izanez gero, 2022.urtean horma bat egingo da ea hurrengo urteetan gehiago.
- Norentzat izango da?
Kamiñazpiko bizilagunentzat, Ondarroako herritarrentzat eta bisitatu nahi duten turista ororentzat.
- Noiz burutuko da?
Klimatologiak ahalbidetzen duenean, posible izanez gero, Kamiñazpiko jaiak hasten direnetik Zapato Azule bitartean, hau da, ekainean.
Proiektua burutu ahal izateko ezinbesteko da muralak euren fatxadan egiteko interesa izan dezaeketen etxe-barruko Jabe Elkarteen baimena beharrezkoa da, hortaz, proiektuari buruz azalpenak emateko Kamiñazpiko etxeetako Jabe Elkarteei batzarrera hurbiltzeko deia egin die Ondarroako Udalak.
