Euskadiko Trainerilla Txapelketa lehiatuko da Ondarroan
Asteburuan lehiatuko da Euskadiko Trainerilla Txapelketa, Ondarroan. Zapatuan 16:00etan emango diote hasiera sailkapen estropadei, eta domekan, 10:30etan, finalak lehiatuko dira.
Pasaden asteburuan lehiatu zen Bizkaiko Trainerilla Txapelketa, Ondarroan, eta Bermeo eta Ondarroa izan ziren garaile gizonezko eta emakumezko absolutu kategorietan.
Asteon, Ondarroako Antxoa Egunaren giroaren baitan, Euskadiko Trainerilla Txapelketa lehiatuko da herrian. Zapatuan, 16:00etan hasiko dira sailkapeneko estropadak, eta izen emateak bukatu berritan, izen ematean izanda talde kopuruak erreparatuta, mutil gazteen kategorian soilik lehiatuko dira sailkapen estropadak. Bestalde, emakumezkoen absolutu mailako neskak txapelketa lehiatzeko aukerarik gabe geratu dira.
Mutil gazteen kategorian, zazpi trainerilla arituko dira sailkapen estropadan, Zumaia, Itsasoko Ama, Kaiku, Ondarroa, Deusto, Sanpedrotarra eta PD Koxtape AE.Neska gazteen kategorian bost taldek izena eman dute: Isuntza, Kaiku, Ondarroa, Zumaia eta Hibaika. Hortaz, zuzenean finaleko estropadak lehiatuko dituzte.
Bestalde, absolutuen kategorian, emakumezkoen hiru taldek izena eman dute, Deustok, Zumaiak eta Ondarroak. Hiru taldek izen eman dutela ikustean, Federazioak emakumezko absolutu mailako Euskadiko Trainerilla Txapelketa ez lehiatzeko erabakia hartu du. Gizonezkoen absolutuan, berriz, lau taldek izena eman dute, hain zuzen ere, Zierbena, Bermeo, Isuntza eta Ondarroak. Hortaz, lau talde hauek ere zuzenean finala lehiatuko dute.
Ondarroa Arraun Elkartetik aipatu dutenez “oztopoak oztopo guk aurrera jarraituko dugu, argi dugu ekintza hau aurrera aterako dugula, eta oraingoan ere, boluntario mordoa egongo da lanean elkartearen alde eta hori nabarmentzekoa da”.
