Gipuzkoako Kopako finalerako txartela eskuratu du Mutriku FTk
Mutriku FTko emakumezko seniorren taldeak Gipuzkoako Kopako finala jokatuko du zapatuan Orioko Mendibeltz zelaian Usurbilen kontra, 17:00etan.
Argazkia: Alberto Gorritiberea Santo Tomas Lizeoa taldearen kontrako finalaurrekoan lortu dute mutrikuarrek finalerako sailkapena. San Miguelen jokatu zuten joaneko partida berdinketan amaitu zen eta itzulikoa penaltietan erabaki zen joan den zapatuan, Berion. Elaia Andonegik talde mutrikuarra markagailuan aurreratu bazuen ere, penaltietara joan ziren. Ordura arte, baina, Mutriku FTk partidu oso gogorra jokatu zuen. Izan ere, norgehiagoka hasi bezain laster, atezainari txartel gorria erakutsi zion epaileak, eta aurrelaria jarri behar izan zen postu horretan; minutu batzuk beranduago, bigarren txartel gorria eta, ondorioz, bigarren kaleratzea jaso zuten. Partidua asko zaildu zitzaien mutrikuarrei.
Tentsioa nabari. Mutriku FTko lantaldeko Domeka Lasartek adierazitakoaren arabera, “tentsio handiko partidua” izan zen Santo Tomas Lizeoaren kontrakoa; dena dela, azaldu du taldeko jokalarien “balioaniztasun handia” agerian geratu zela: “Ez da ohikoa aurrelariak atezainaren tokia hartu eta maila hain ona erakustea, egundoko partidua izan zen”. Penaltien tandan, aurkariak gol bakarra sartu zuen, aurrelari-atezainak hiru jaurtiketa geratzea erdietsi baitzuen. Mutriku FTk, ostera, hiru gol egin zituen, finalerako txartela lortzeko balio izan zizkienak.
11 jokalariren lana bederatziren artean beteta, “edozertarako gai” direla adierazi du Lasartek: “Finalaurrekoan lortutakoa zelakoa izan zen ikusita, finalean gailentzeko aukerak ditugu, eta ikuspuntu horregaz ekingo diogu finalari”. Lasarteren ustez, dena dela, “jadanik bete da helburu nagusia, hau da, finalerdiak gainditzea”.
