Mankomunitateak enpresetara bisitak egin ditu hondakin organikoen bilketa indartzeko
Debabarrenako Mankomunitatea jangela propioa duten enpresak, industrialdeetan kokatuta dauden eta hondakin organiko ugari sortzen dituztenak, eta industrialdeetako jatetxeak bisitatzen ari da, hondakin organikoen gaikako bilketa sustatzeko.
Dagoeneko asteon bisitatu ditu jantokia duten enpresak, hondakin organikoak birziklatzeko ohiturak aztertzeko eta, behar izanez gero, erraztasunak eta baliabideak emateko.
Iosu Arraiz Mankomunitateko lehendakariak adierazi duenez, “Debabarrena eskualdean enpresa sare garrantzitsua daukagu, eta gehienak jasangarritasunaren aldeko urratsak egiten ari dira azken urteetan. Mankomunitatetik lanean dihardugu gizarteko kolektibo guztiengan birziklapen ohitura egokiak sustatzeko. Esaterako, ingurumen hezkuntza saioak ematen ari gara ikastetxeetan, eta “Hemen ondo birziklatzen dugu” kanpaina garatu dugu eskualdeko saltokietan. Oraingoan eskualdeko enpresengana hurbildu gara, beharrak entzun eta baliabideak eskaintzeko. Izan ere, guztion inplikazioa ezinbestekoa da gaikako bilketaren tara hobetzeko”.
Enpresetara lehen bisita egiten ari da orain, eta harrera ona izaten ari da, hondakinen arduradunek interesa erakusten baitute gaikako bilketa hobetzeko eman ditzaketen pausuetan.
Lehen bisitan hondakin organikoen gaikako bilketa egiteko dituzten beharrak identifikatu ondoren, Mankomunitateak bigarren bisita bat egingo du enpresetara ekainaren bigarren hamabostaldian, lehen bisitan adostutako baliabideak emateko: organikoa jasotzeko edukiontzi berriak, tamaina jakin bateko edukiontzi marroiak etab.
