320 pertsona batu ditu Lekeitioko Eskolako 3. Familien Egunak
Aurreko urteetan baino hiru aldiz pertsona gehiagok bazkaldu zuten zapatuan [maiatzak 28].
Aurreikuspen denak apurtu zitzaizkien Lekeitioko Eskolako guraso elkarteari 3. Familien Egunean. Eguraldi eguzkitsuak eta epelak asko lagundu bazuen ere, “ametsik onenetan ere ez” ez zuten zuten espero 320 pertsona batzea. Aurreko urteetako kopurua hirukoiztu zuten.
Eskolako egunerokotasunik kanpo harremanak sendotzeko eta komunitate izaera lantzeko eguna da Familien Eguna. Duela lau urte antolatu zuen Guraso Elkarteak lehen aldiz, harrera bikaina izan zuen eta orain beste maila batera eraman dute jai eguna.
Zapatuan [maiatzak 28] 12:00etan eman zioten hasiera jaialdiari umeentzako bideratutako tailerrekin. Denetarik antolatu zuen Guraso Elkarteak, lan banaketa bikaina esker, taldeetan banatu zituzten eginbeharrekoak. Ur jolasak, herri kirolak, margolanak, tatuajeak… hamaika aukera izan zituzten umeek. Hala ere, zalantzarik gabe arrakastatsuena jarritako tirolina izan zen.
14:15ean bazkaltzeko ordua izan zen, 320 pertsonek eman zuten izena, “inoiz baino gehiagok”. Lankidetzaren bidez bazkaria aurrera eramatea lortu zuten, eskolako jantokiko langileek, esate baterako, bolondres aritu ziren janaria prestatzen. Estik eta Olatzek kantuz girotu zuten bazkaldu osteko denbora. Gero, talent showaren unea izan zen, Lehen Hezkuntzako bigarren mailatik bosgarren mailara arteko umeen bederatzi taldek parte hartu zuten.
Egunari amaiera borobila emateko DJa izan zuten eta ekintzak, tirolina batez ere, 21:00ak arte luzatu zuten. Guraso Elkarteko antolatzaileek ezin izan dute balorazio hoberik egin: “Beste urte batzuekiko aurreikuspen denak apurtu ziren eta eguna lankidetzaren eta komunitate izaera horri esker atera dugu aurrera. Zalantzarik gabe aurtengoak aurrera begira indar handia eman digu”.
