Isuntzako gazte mailako emakumeek Espainiako Trainerilla Txapelketa irabazi dute
40 urte pasa dira 'Lekittarra'-k Espainiako Estatuko azken txapelketa irabazi zuenetik.
Lekeitioko Isuntza Arraun Taldea Espainiako trainerilla txapeldun izendatu da emakumezkoen gazte mailan asteburuan [maiatzak 28-29], Bueun, Pontevedran (Galizia). 40 urte pasa dira Lekittarra-k Espainiako Estatuko azken txapelketa irabazi zutenetik.
Madalen Goitia, Katalin Negrete, Maialen Zenarruzabeitia, Jule Arkotxa, Malen Mintegia eta Lexuri Zendoia eta Irati Zendoia dira Isuntzako historian haien izen eta abizenak letra handiz idatzi dituztenak. Hirugarren kaletik irten ziren Galiziako uretan, eta lehen paladatik erakutsi zuten historia egiteko haien desioa. Lehen ziabogarako lekeitiarrek bost segundoko tartea zabaldu zuten Kaikuko aurkari zuzenen aurka. Bi ontzirik indartsuenak zirela argi geratu zen; atzean utzi zituzten bai Riveira baita Camargo ere, lehen ziabogan 12 eta 16 segundora, hurrenez hurren. Bandera bizkaitarren artean zegoen.
Bigarren luzean Kaikuk Isuntzaren hauspoa berdindu zuen, ez zuten ihes egiten utzi nahi. Bigarren ziabogarako tartea ia bera zen, sei segundokoa, baina ikusi beharra zegoen zelan eragingo zuen esfortzuak arraunlariengan. Hirugarren luzean, pixkanaka bazen ere, lekeitiarrak zuloa handiagotzen joan ziren, erritmoa mantendu zuten, eta ezkerraldeko ontziari kosta egin zitzaion maila mantentzea; 11 segundora arte zabaldu zuten tartea. Azken luzeko lehen metroetan erritmoa bizitu zuten lekeitiarrek, eta azken txanpan gozatzeko aukera izan zuten. Historia egin zuten. Azkenean, 16 minutu, 21 segundo eta 26 ehuneneko denbora eskuratu zuten. Kaiku bigarrena 15 segundora heldu zen, Riveira, hirugarren, 43 segundora eta laugarren izan zen Camargo, minutu bat eta 22 segundora.
Atzo [maiatzak 29] ia gauerdian heldu ziren Lekeitiora, hala ere, herritarrak zain izan zituzten merezitako harrera egiteko prest.
Argazkia: Isuntza Arraun Taldea
