Lekeitiora arte zabalduko dute Bilbo Bizkaia Harroren ortzadarra
Ekainaren 24 eta 25ean hainbat ekintza antolatu ditu udalak Ortzadar LGBT Elkarteagaz LGBTI+ Harrotasunaren Egunaren harira
Lekeitio kolorez beteko da ekainaren 24 eta 25ean, ortzadarreko koloreek hartuko dituzte herriko kaleak, hain zuzen ere. Ekainaren 28an nazioarteko LGBTI+ Harrotasunaren Eguna ospatzen da eta Lekeitiok bat egin du Ortzadar LGBT Elkarteak antolatzen duen Bilbo Bizkaia Harro egitarauagaz. Atzo [maiatzak 30] egin zuten aurkezpena Bilboko Euskalduna Jauregian eta bertan izan zen Koldo Goitia Lekeitioko alkatea. “Helburua da aniztasun afektibo-sexuala eta genero-identitateko aniztasuna aldarrikatzea”.
Argazkia: Lekeitioko Udala
Bilbo Bizkaiaren ekimenak ekainaren 16tik 29ra luzatuko badira ere, Lekeition azken asteburuan pilatuko dira, ekainak 24 eta 25ean. Udalak herriko plazan jarriko duen oholtzan antolatuko ditu ekintzak. Barikuan 20:00etan oraindik zehazteke dauden protagonistekin aurkezpen ofiziala egingo dute, jai girorako irekiera izango da, pregoia bailitzan. Ostean, euskarazko ‘Aitona Mantangorria’ film laburra eskainiko dute. 21:00etan Yogurinha Borovak hartuko du hitza bere ikuskizunagaz. Eguna amaitzeko DJa jarriko dute.
Hurrengo egunean, zapatuan, egitaraua ez da askorik aldatuko, protagonistak bai, ordea. 20:30etik aurrera bi film labur proiektatuko dituzte: lehenengo, “El mundo entero” gazteleraz, eta gero, ‘Red bay’ euskaraz. Ondoren, Kai Nakai abeslariak kontzertua eskainiko du eta itxiera moduan DJa egongo da herriko plazan. Ekintza hauetaz gain herriko ostalari eta merkatariek ere asteburua girotzeko ekintzak egingo dituzte. Udalak herriko kaleak ostadarreko banderekin eta koloreekin apaindu nahi ditu.
Bidea egiteko. Bilbo Bizkaia Harro kanpaina “inoiz baino indartsuago” itzuli dela iragarri du Ortzadar LGBT Elkarteak eta behin pandemiaren unerik latzenetako egitarau murriztua atzean utzita, ohiko formatura itzuli dira. Ekainaren 16tik 29ra musika, alaitasun eta aldarrikapenez beteko dituzte hiriguneak. Sei arlo nagusitan banatu dituzte ekintza: Musika, alaitasuna, kultura, euskara, hezkuntza eta zientzia. Bilbon, Areatzan, besteak beste, Sorayak kontzertua emango du eta Ur Parade itsasontzien desfilea egingo dute itsasadarrean.
Aurten ortzadarra Bilbotik eta Bizkaitik zabaldu nahi izan dute, Lekeitioz gain Plentzia eta Santurtziko Udalek ere bat egin dute ekimenarekin. “Aniztasuna ezinbesteko balorea da jendarte libre eta inklusibo bat eraikitzeko”, adierazi zuten aurkezpen ekitaldian. 2015ean antolatu zuen Ortzadar LGBT Elkarteak lehen aldiz Bilbo Bizkaia Harro ekimena eta 2019an Espainiar Estatuko mugimendu indartsuenetako batean bilakatu zen.
“Oraindik ere beharrezkoa da denok batera arraun egitea”, esan zuten. 2021ean Bizkaian, Gipuzkoan eta Araban Eusko Jaurlaritzaren Berdindu zerbitzuak LGBTI-fobiarekin lotutako 34 salaketa jaso zituen. “Egunero erakusten digute intolerantzia eta bazterkeria ez direla desagertu, mingarriak direla, eta lehenbailehen aurre egin behar diegula, aniztasuna ospatuz”, adierazi zuten elkartekoek.
