Elena Arrizabalaga: “Ilusio eta gogo askorekin nago nire lehenengo erakusketaren aurretik”
Margolari markina-xemeindarrak barikuan [ekainak 3] aurkeztuko du Arima bere lehen erakusketa Uhagonen.
Elena Arrizabalaga urte askotan egon da marrazki klaseak ematen Markina-Xemeinen, baina orain bere margolanak aurkeztuko ditu lehen aldiz. Markina-xemeindarrak Arima izeneko erakusketa estreinatuko du barikutik [ekainak 3] aurrera Uhagon kultur guneko erakusketa gelan eta ekainaren 25a arte bariku eta zapatuetan, 12:00etatik 14:00etara eta 18:00etatik 20:00etara.
“Ilusio eta gogo askorekin nire margolanak lehen aldiz erakusteko, arte ederrak ikasten hasi nintzenetik nire ametsetako bat zen”, adierazi du Arrizabalagak. Konfinamendua ondo etorri zitzaion margolariari, denbora gehiago izan zuen bere zaletasuna lantzeko, teknika berrietan sakondu zuen, “mesede egin zidan”. Terapia bailitzan erabili zituen margolanak markina-xemeindarrak, egoeratik alde egiteko modu bat. Era berean, itxierak zeharo aldatu zuen Arrizabalagaren ikusmira, “ordura arte nire gozamenerako uzten nituen lanak, baina orain kontaktu gabeko hainbeste denboraren ostean bata besteari partekatzeko beharrizana izan dut”.
Arima izenburua jarri dio bere lehen erakusketari. “Nire bizitzako arlo denak hobekien laburbiltzen dituen hitza dela esango nuke. Margolanetan nire arima islatu nahi izan dut eta era berean, ikusleen arimara heldu nahi dut”. Bere lanetan Arrizabalagak bere bizitzarekin lotutako dena islatzen du, familia, paisaia, lagunak… azkenean komunikatzeko modu bat da.
Uhagon kultur gunera hurbiltzen direnak Elena Arrizabalagaren esperientziak biziko ditu: “Margolanetan nire bizipenak transmititzen ditut, nire helburua da emozioak arimara heltzea, ikusleak momentu gozo bat bizitzea”.
Hala ere, ez du atzean utzi bere marrazki klaseak, are gehiago, margolanez gain, marrazki txikien xarma azpimarratu nahi izan du artistak: “Marrazkietan errealitatea marrazten dugu, baina gero bakoitzak bere kutsua ematen dio eta errealitate magikoan bilakatzen da”.
