Auritz Mendia eta Eñaut Urkaregi izendatu dira Euskadiko txapeldun, Etxebarrin
Zapatuan [ekainak 4] lehen eta bigarren urteko kadeteek lehiatu zuten Etxebarriko V. sari nagusia
Zerura begira egon ziren txirrindulariak egun osoan, euriaren mehatxua hor baitzegoen. Bigarren urteko kadeteek zoria alde izan zuten. Markina-Xemeingo txirrindulari elkarteak Etxebarriko Udalagaz eta Amets Txurruka lagunartiek taldeagaz batera antolatu du Etxebarriko V. sari nagusi gogorra.
Zaharrenek 61,7 kilometroko ibilbideari egin behar izan zioten aurre eta beste behin Gontzugaraiganako mendateak erabaki zuen lasterketa. Azken igoeran egin zuen ihes Auritz Mendiak eta atzean utzi zituen gainontzeko txirrindulariak. Jaitsieran, errepidea busti barik egonda, atzekoek ezin izan zioten tarterik kendu. Caja Rural taldeko Mendia gazteak nagusitasun osoz irabazi zuen lasterketa, Euskadiko txapeldun izendatuz. Atzetik hamaika txirrindulariko multzoa osatu zen eta esprintean erabaki ziren podiumeko beste bi tokiak, Hodei Muñoz iza zen bigarren eta Peio Albizua hirugarren. Laugarren helmugaratu zen Lurdan Garcia, Lea-Artibaiko lehen parte hartzailea.
Lehenengo urteko kadeteek ez zuten hainbesteko zorterik izan. Atzerapenagaz hasi zuten lasterketa eta euriak harrapatu zituen txirrindulariak bete betean. Eguraldiak are eta gehiago gogortu zuen Etxebarriko V. Sari nagusia. Beste behin Gontzugaraiganako mendatea erabakigarria izan zen. Ganean txirrindularien arteko tarteak, txikiak baziren ere, zabaldu ostean, aldatz behera berdintasun handia egon zen. Errepidea blai eginda zegoenez, gehiago arriskatu zutenek saria izan zuten, igoeran galdutako denbora berreskuratu zuten. Gauzak horrela, 18 txirrindulariz osatutako multzoa heldu zen helmugara. Esprintean bizkorrena Eñaut Urkaregi izan zen, eta denbora berean sartu ziren bere atzetik Iker Colmenero eta Arakaitz Suso. Alain Aranzamendi izan zen eskualdeko lehen txirrindularia helmugan.
