Giro ona nagusi, Artako San Pedro jaietan
Jende ugari batu da ospakizunera. San Pedro ermitaren ondoko frontoi ingurua jendez bete zen domeka [uztailak 3] goizean.
Jendea dantzan Artako San Pedro jaietan. Giro ederrean ospatu dituzte sanpedroak Ziortza-Bolibarko Arta auzoan. Jende ugari batu zen ospakizunera, batez ere domeka [uztailak 3] goizean. Mezaren ostean, San Pedroren ermita eta frontoi inguruak jendez bete ziren Markina-Xemeingo Zerutxu dantza taldekoen dantzak ikusi eta Lizaso, Egaña, Mendizabal eta Larrañaga bertsolarien saioagaz gozatzeko.
Agurra, ezpata dantza, zaragi dantza, txulalai eta beste hainbat dantza eskaini zituzten Zerutxuko txiki eta gaztetxoek txistulariek lagunduta lehenengo, eta Jose Luis Laja eta Lutxurdixoren trikiti doinuekin lagunduta gero. Dotore aritu ziren dantzan Zerutxukoak eta alaitasunez bete zuten jaigunea. Eta, giro onak aurrera egin zuen trikitilarien laguntzagaz. Panderojole txiki batek lagundu zituen Laja eta Lutxurdixo oholtza gainean, entzuleen harridurarako, eta lagun taldea animatu zen haiek eskainitako erromeriara dantzara. Soltean egin zuten dantza, polka ere bai eta bateko batzuk eta besteko besteak animatu ziren dantzara.
Trikitilarien ostean, bertsolariek hartu zuten txanda. Lizasok, Egañak, Mendizabalek eta Larrañagak era askotako kontuak plazaratu zituzten, umore onean.
