Lapurdik eskuratu du Mutrikuko Yurrita Group bandera
Mutrikuko taldeak seigarren postua eskuratu zuen estropadan, eta hortaz, lau puntu eskuratuaz, laugarren postuan dago sailkapen orokorrean.
Zapatuan lehiatu zen seigarren Yurrita Group bandera Mutrikun. 16:30ean eman zioten hasiera jardunaldiari, eta hain zuzen ere, hiru tandatan banatu ziren.
Lehenengo tandan, Castro Marinera, IRC Santoña eta Trintxerpe atera ziren, eta Santoñak izan zen tandako azkarrena. Bigarren tandan, Donostiarra, Hibaika eta Astillero, azken hau izanik tandako lehenengoak helmugaratzen. Hirugarrenean, berriz, Portugalete, Mutriku eta Lapurdi atera ziren, eta nagusitasunez helmugaratu ziren lapurdikoak.
Estropadako garaile, nagusitasunez izendatu zen Lapurdi, 21 minutu 52 segundo eta 87 ehuneneko denboragaz. Bigarren sailkatua, Astillero izan zen 22 minutu 11 segundo eta 29 ehunenekogaz. Hain zuzen ere, segundo eskas batera heldu zen Donostiarra, 22 minutu 12 segundo eta 12 ehuneneko osatuaz. Laugarrena Hibaika izan zen, 22 minutu 20 segundo eta 92 ehuneneko denbora eginaz. Bosgarren eta seigarren postuak lehiatuak izan ziren, hain zuzen ere, Portugaletek 22 minutu 35 segundo eta 28 ehuneneko egitea lortuaz bosgarren helmugaratu zen, eta 22 minutu 26 segundo eta 03 ehunenekogaz, seigarren postuarekin geratu ziren Mutrikuarrak. Zazpigarren helmugaratzen Santoñarrak izan ziren, 22 minutu 56 segundo eta 79 ehunenekogaz. Castro, berriz, zortzigarren postuagaz geratu zen 23 minutu 50 segundo eta 54 ehunenekogaz, eta Trintxerpe etorri zen atzetik, 24 minutu 23 segundo eta 12 ehunenekogaz osatuz estropada.
