LeartiADI SOS Taldeak emaitza ikusgarriak lortu ditu Espainiako Kopan
Hiru modalitatetan parte hartu zuten, eta hain zuzen ere, banderen jokoan, taldekide guztiek lortu zuten finalerako txartela.
LeartiADI SOS Taldeak Castroko Oriñon hondartzan burutu zen Espainiako Salbamendu eta Sorospen Kopan parte hartu zuten zapatuan, eta taldearentzat lehenengo aldia izan zen arren, emaitza izugarriak eginda bueltatu dira herrira.
9:30eako prest zeuden LeartiADI SOS taldeko hamabost parte hartzaileak, Castroko hondartzan. Lehenengo froga surf igeriketa izan zen, eta Ondarroako taldeko sei soroslek lortu zuten finalera sartzea. Ikustaldi ederra emanez, emaitza bereziki onak lortu zituzten Espainiako Kopako lehenengo frogan. Ametz Valencia izan zen, hain zuzen ere, erakustaldi ederra eman eta emaitza onenak lortuta hemezortzigarren postua lortu zuena. Gutxira, Aiur Alkorta helmugaratu zen, hogeigarren postuan.
11:30ean, salbamenduko taularekin lasterketa froga hasi zen. Iñaki Iturri entrenatzaileak jakinarazi duenez, “gutxien landu duten modalitatea da, material egokirik ez dugulako zehazki froga honetarako”. Finalerako txartelik ez zuten lortu, baina hala ere, maila oso ona erakutsi zuten taldekide guztiek, eta pozik agertu da entrenatzailea sorosleek izandako jarrerarekin.
Azken froga, hondarrekoa izan zen, banderen jokoa. Kasu honetan, taldearen maila ezinhobea agerian utziz, taldekide guztiek lortu zuten finalerako txartela. Hori gutxi ez balitz, Unai Urruzunok zortzigarren postua eskuratu zuen.
Iñaki Iturri entrenatzailearen esanetan “esperientzia izugarria izan da guztiontzat, taldeak oso ondo lehiatu du, presio barik atera dira eta ondo pasatu dute. Helburuak bete dira“. Esperientzia oinarri hartuta, hurrengo helburuak jada finkatu dituzte, abuztuaren 6an burutuko da aurtengo hirugarren Espainiako Koparen jardunaldia, eta data “eskasak” diren arren, baloratzen ari dira parte hartuko duten edo ez. Hala ere, taldeak lanean jarraituko du udazkenean hasiko den igerilekuetako txapelketetan parte hartzeko.
