Markina-Xemein Grand Slamak baditu lehen finalistak
Jean Dominique Olharan eta Nicolas Etxeto dira Markina-Xemein Jai Alai Grand Slameko lehen finalistak. Iñaki Osa Goikoetxeari eta Eñaut Salegiri irabazita lortu dute finalerako txartela. Aritz Erkiaga eta Jon Zabala Xabi Barandikaren eta Julen Del Rioren kontra neurtuko dira zapatuan, bigarren bikote finalista zein izango de argitzeko.
Olharan eta Etxeto, lehen finalistak. Argazkia: Zigor Etxebarria. Asteburuan Markina-Xemein Jai Alai Gran Slameko lehendabiziko finalaurrekoa lehiatuko zen, Uni pilotalekuan. Jokatu zuten puntistak final handirako txartela lortzeko asmoz aritu ziren, eta ikusleek partidu oso serioa eta oso ederra ikusteko aukera izan zuten. Hain zuzen ere, Markina-Xemeingo frontoia jendez lepo agertu zen, giro bikainean. Txapelketako antolatzaileek azaldutakoaren arabera, “duela 25-30 urtetik ez da izan horrelako ikusle oparotasunik”. Finalerdietako lehenengo txanpak Jean Dominique Olharan pautarra eta Nicolas Etxeto bidartarra Iñaki Osa Goikoetxea zumaiarraren eta Eñaut Salegi markina-xemeindarraren aurka elkartu zituen. Olharan eta Etxeto, lehen minututik, norgehiagokan oso sartuta atera ziren, pilota bakarra ere ez galtzeko helburuz, eta erritmo handia ezarri zuten jokoan.
Argazkia: Zigor Etxebarria.
Lehen tantoetatik (1-1, 3-3, 4-4, 5-5, 5-7, 7-7), maila handiko zesta punta izan zen Unin. Lau pilotarietatik distiratsuena Goikoetxea izan zen: bere pilotakada moztuek partidua markatu zuten. Beste behin, egungo errebotelaririk onena erakutsi zuen, eskumako eskuagaz. Bikote urdina, Goikori esker, 7-8 aurreratu zen lehenengo atsedenaldia orduko; jokoa berrezarrita, 11-11ko markagailu zeharo parekatua lortu zuten, eta, azkenean, 11-15 gailendu ziren urdinak lehen setean. Bigarren aldiaren hasierak ere lehenengoaren ezpal beretik egin zuen: berdintasunez gainezka. Lau puntistak zein baino zein gehiago aritu ziren 7-7ko markagailura iritsi arte. Orduantxe, Olharanek eta Etxetok urrats bat egin dute aurrera, eta Goikoetxeak eta Salegik, ostera, apur bat jaitsi dute beren maila.
Argazkia: Zigor Etxebarria.
Olhararek eta Etxetok frogatu zuten, beharbada, ez dutela partiduak indarrez apurtzeko abilezia aipagarriegik, baina bai, ordea, norgehiagoka osoa hasieratik amaierara arte erritmo oso bortitzean egiteko ahalmena. Horregaz, tantoz tanto aurrea hartu, eta 7-15 irabazi zuten finalaurrekoa. Galtzaileei dagokienez, maila handian ibili ziren biak, baina partiduaren azken txanpan. Ikusleek berotasun handiz hartu zuten, batez ere, etxeko pilotaria: Eñaut Salegi. Izan ere, txapelketa osoan maila bikaina erakutsi du atzelari horrek, eta igarri zen etxeko pilotalekuan distiratsu agertze aldera egin duen isileko lan guztia. AEBetan hamar urte inguruz jokatu ondoren, Markina-Xemeinen, etxekoen aurrean, jokatu du Salegik Euskal Herriko lehendabiziko txapelketa.
Argazkia: Zigor Etxebarria.
Aurkarien zain. Olharan eta Etxeto, lehen finalistak, Karmen Eguneko finalean arerio izango duten bikotea zein izango den jakiteko esperoan daude. Bi aukera daude: batetik, Aritz Erkiaga aurrelari ispastertarra eta Jon Bullet Zabala atzelari markina-xemeindarra; bestetik, Xabi Barandika aurrelari gernika-lumotarra eta Julen Del Rio atzelari gasteiztarra. Datorren zapatuan jakingo da bigarren bikote finalista zein izango den.
Argazkia: Zigor Etxebarria.
Argazkia: Zigor Etxebarria.
