Oihana Kortazar, Bastidako mendietan nagusi
Oihana Kortazar mutrikuarrak Bastida Vital Trail proba irabazi du. Emakumezkoen senior mailan lortu du garaipena. EMF Kopako laugarren lasterketa puntuagarria izan da Bastidakoa.
Argazkia: EMF Mendi lasterketaz betetako asteburua izan da, eta inguruko mendi korrikalarietako askok beren bertsiorik onena eman behar izan dute lehiatu diren probetan. Ehunmilak ultra-trail, Goierriko Bi Handiak edota Marimurumendi probez gain, Bastidan Euskadiko Mendi Federazioaren Kopako laugarren lasterketa puntuagarria lehiatu zuten, zapatuan: Bastida Vital Trail.
Oihana Kortazar mutrikuarra eta Imanol Goñi natxituarra goiko kotan aritu ziren proba horretan, eta maila benetan handia erakutsi zuten ibilbide gogorrean zehar; izan ere, izena eman zuten ia 150 mendi korrikalariek 23 kilometroko eta 1.200 metro positiboko desnibeldun ibilbidea osatu behar izan zuten.
Kortazarrek emakumezkoen senior mailan garaipena eskuratu zuen; Burumendi MT taldekoak Toloño mendian gora ihes egin zien gainontzeko korrikalariei, eta 01.59,00ko denbora behar izan zuen. Maila horretan, lasterketako denbora ordu bitik jaisteko ahalmena eduki zuen parte-hartzaile bakarra izan zen Kortazar. Bigarren postuan Aiaramendi Korrikalariak taldeko Ainara Urrutia sailkatu zen, ia 11 minututara. Podiumean hirugarren sailkatua Naiara Irigoien izan zen.
