Aurreakordioa sinatu dute Bizkaiko Garbiketa hitzarmenean
Gaur [uztailak 15] patronalarekin izandako bileran Bizkaiko Garbiketaren sektoreko aurre hitzarmena sinatu dute UGT, CCOO eta LAB sindikatuek.
Bizkaiko eraikin eta lokalen Garbiketa Hitzarmenerako aurreakordioa lortu da gaur goizean patronalarekin egindako bileran. LAB sindikatutik jakinarazi dutenez, aurreakordioaren ardatz nagusiak bi izan dira: “Hitzarmenaren indarraldirako (2021-2024) %13ko igoera jasotzea eta 1.200 euroko gutxieneko soldata bermatzea, hamabost ordainsaritan. Gainera, KPIaren ehuneko batuketak emaitza handiagoa emango balu, soldatek %2ko igoera osagarria izango lukete. Horrez gain, batzorde espezifiko bat sortuko da bakanteen estaldura arautzeko helburuz, lanaldi partzialak luzatzeko aukera eskainiko duena”.
Bestalde, ELA sindikatutik adierazi dute ez datozela bat sinatutako aurreakordioagaz. “Akordio horren bidez, langileen kolektiboa kondenatu besterik ez da egiten orain arteko prekarietateagaz jarraitzera”. Aipatu dutenez, hitzarmenak ez ditu bermatzen azken bi urteetako KPIen mailak, hortaz, 12.000 langileri eragiten dion kolektiboak erosteko ahalmen galera handia edukiko du. “Sinatutako akordioak ez du inolako neurririk aurreikusten sektorean dagoen partzialtasuna hobetzeko, eta ez du jasotzen soldata arrakalagaz amaitzeko erreferentziarik ere”.
Sindikatu biek erreferentzia egin diote langileek azken hilabeteetan egindako borrokari. “Zoriondu egin nahi ditugu hamar greba egun egitea erabaki duten langileak. Era berean, hitzarmenen alde borrokatu duten eta borrokatzen ari diren guztiak zoriondu nahi ditugu, borrokatuz sektorearentzat benetan duinak diren edukiak lortu daitezkeela erakutsi baitute”, esan du ELAk. “Grebarik egin gabe 30 urte zeramatzan kolektiboa lehen lerroan kokatu da azken hilabetetan egindako ekintza eta protestekin, patronalak mugitzera behartuz. Antolatzeko eta beren baldintzen alde borrokatzeko hautua egin zuten”, adierazi du LABek
Gaurko bileraren ostean, LABek bere oinarrietara eramango du aurreakordioaren edukia, eta horiek bermatuz gero, hurrengo bileran sinatuko lukete hitzarmena.
