"Guztiok ondo pasatzeko beharrezkoa da guztiok arduraz jokatzea"
Egitarau zabal eta oparo batekin datoz Mutrikuko Jai Batzordeak antolatutako Malen jai herrikoi eta alternatiboak
Bi urteren ostean, berriz ere, Malen jaiak prestatzeko erronkari heldu diozue. Zein izan da antolakuntzaren ardatza?
Alaitz Mendizabal Martinez: Martxoan hasi ginen jai batzordea batzen. Bi urte hauetan ere batu gara eskaintza desberdin bat eskaintzeko Malen jaiei begira, baina aurtengo jaiak antolatzeko pandemia aurreko moduari heldu diogu.
Ihar Sanchez Uranga: Hasieran, norbanako zein antolakunde desberdinek osatutako bileretan hartzen ziren erabakiak, eta gero hainbat lan talde sortu genituen, lana banatu eta eraginkorragoak izateko, besteak beste, egitaraua, protokoloa, Gazte Eguna eta komunikazioa izan ditugu.
Zein izan da Jai Batzordearen helburua jaiei begira?
A.M.M.: Batetik, jai herrikoi alternatiboak eskaintzea izan da, ahalik eta egitarau zabalena osatuz eta guztiontzat gustukoak izan daitezkeen eskaintzaz betez. Bestetik, jai hauek, espazio seguru eta erosoak izan daitezen ere lanean aritu gara, eta hau horrela izatea espero dugu.
Egitaraua ardatz hartuta, nola bideratu duzue eskaintza? Zer lortu nahi izan duzue?
I.S.U.: Ikusten den bezala, egitaraua ez dugu soilik kontzertuetara mugatu. Egunez ere aisialdira begiratuta hainbat ekintza antolatu ditugu, eta gure ustetan, behintzat, kontzertuak bezala, anitza izan da. Adibidez, Gazte Eguna antolatzeko Jai Batzordetik kanpoko lan talde bat egoteak jendearengana hurbiltzeko aukera eman digu.
A.M.M.: Eta horixe izan da lortu duguna, hain zuzen ere, egitaraua ez mugatzea soilik gure gustuetara, eta, beste alde batetik, lan karga jende gehiagorekin banatu ahal izatea.
Zer nabarmenduko zenukete?
A.M.M.: Egitarauari dagokionez, aurten ere, oso pozgarria da guretzat kanpotik datozenen eskaintzez gain, Mutrikuko hainbat taldek egitarauan parte hartuko dutela ikustea.
I.S.U.: Egitaraua urtero aldatzen da, eta aurten ere halaxe izan da. Ez da egon zerbait bereziki kentzea erabaki dugunik. Baina bai, aldiz, mantentzen diren ekimenak. Urtero errepikatzen diren eskaintzak; Gazte Eguneko bazkaria edota Kuadrilla Egunean alternatiba bezala sokamuturraren orduan gaztetxean izango den karaokea etabar…
Zein izango da aurtengo omendua? Zergatik?
I.S.U.: Urteetan lan militantea egin duten gure herriko jendea, bueltan ezer jaso gabe dena eman dutenak.
A.M.M.: Txosnetan orduak sartzen dituen jendea, hurrengo egunean dena garbitzera joaten direnak… Ez soilik militanteak, jaiak aurrera ateratzeko atzetik lan pila bat egiten duen jende hori guzti hori gustatuko litzaiguke omentzea.
Zein da zabaldu nahi duzuen mezua?
A.M.M.: Zabaldu nahi dugun mezua da jaiak guztiok ongi pasatzeko antolatzen ditugula, baina beharrezkoa dela guztiok arduraz jokatzea, eta antolatu dugun egitarauan ez dugula inon-
dik inora inolako erasorik onartuko. Hau horrela izanda, adierazi nahi dugu erasoren bat ematen bada, erantzun bat izango duela.
Indarkeria matxistari bideratutako protokolorik, erabakirik hartu duzue?
A.M.M.: Bai. Txosnagunean protokoloak martxan izango ditugu. Antolatu dugun egitarauan edonolako erasoak ematen badira, bertara gerturatu eta bertan protokoloa aktibatu eta erantzun bat emango da.
I.S.U.: Aurretik esan bezala, antolatutako jaiak guztiontzat seguruak izatea bai edo bai bermatu behar da, jakin badakigun arren, ez dagoela guztia gure esku. Horregatik marra gorriak pasatzen badira, bere ondorioak izango ditu.
![[Malen jaietako egitaraua]](https://lea-artibaietamutriku.hitza.eus/site/files/2022/07/mutrikuko-malen-jaiak-egitaraua.jpg){kind=link}