Herria eta kirola uztartuz, 50 urteko ibilbidea
Mutriku Sokatira Taldeak herri kirolen erakustaldia egingo du Mutrikuko Txurruka plazan, Malen Egunean. Gainera, taldearen 50. urteurrena omenduko dute, eta udalak plaka bat emango die kideei.
Malen Eguneko herri kirol erakustaldian parte hartuko duten taldekideetako batzuk. Mutriku Sokatira Taldea ospakizun gosez dago. Izan ere, lehiaketaz lehiaketako zurrunbiloan murgilduta egon arren, klubekoei atzera begiratzeko eta lortutako guztiaz gozatzeko unea ailegatu zaie. Mende erdia pasatu da Mutriku Sokatira Taldea sortu zenez geroztik, eta urteurren hori ospatzeko aukera paregabea edukiko dute, hilaren 22an.
Izan ere, Mutriku Sokatira Taldeak aurtengo Malen jaietako egitarauan parte hartuko du eta, hain zuzen ere, herri kirol erakustaldia egingo dute Txurruka plazan. Mutriku Sokatira Taldeko kide Jabier Urrestik adierazi duenaren arabera, ez da lehendabiziko aldia herri kirolak plazara edota kalera ateratzen dituztena; dena dela, Mutrikun eta, gainera, Malen Egunean egiteak “balio erantsi oso esanguratsua” ematen dio.
19:00ak inguruan ipiniko dute martxan sokatira elkartekoek herri kirolen erakustaldia eta, taldetik aurreratu dutenez, ordu biko iraupena izango du, gutxi gorabehera. Nahikoa prestatuta joango dira partaideak hitzordu handira; izan ere, azken asteotan entrenamendu saioak egiten aritu dira Saturraranen eta, horrenbestez, emanaldi oso txukuna egiteko bezainbesteko maila dute kide guztiek.
Erakustaldia ikustera bertaratzen direnek euskal herri kirol tradizionalez gozatzeko aukera izango dute: nola jokatzen diren, beraien nondik norakoak zeintzuk diren, denetariko teknikak eta abar. Besteak beste, jorratuko dituzten kirolak trontza, lasto jaurtiketa, zaku nahiz txinga eramatea, txokor batzea eta, zelan ez, sokatira izango dira.
Omenaldirako tarte berezia. Herri kirolen zuzeneko erakustaldiaz gain, Mutriku Sokatira Taldeak, elkartearen mende erdiko ibilbidea gogoratze eta omentze aldera, bestelako ekimen bat ere egingo du Malen Egunean. Plazan jarritako pantaila handi batek taldearen historiagaz erlazionaturiko dokumentuak erakutsiko ditu. Batik bat, argazki zein bideo zaharrak erakutsiko dituzte, zenbait testigantzarekin batera.
Dokumentu horiek guztiak Urrestik eta “hurreko jendeak” egindako bilketaren ondorio dira. “Zenbaitek badituzte, esate baterako, taldea sortu zeneko argazkiak edota bideoak, eta oso berezia izango da omenaldirako momentu horretan herritarrei erakustea”.
Bestalde, Urrestik argitu du Mutrikuko Udalak ere esku hartzea izan duela memoria egitasmo horren antolakuntza lanetan. Horren erakusle da, esate baterako, udalak plaka bat emango diela taldeko ordezkariei, 50 urteko bidea oroitzeko eta eskertzeko.
Herri kirolek egun daukaten jarraipenaz eta atxikiduraz galdetuta, Urrestik erantzuna argi eta garbi du: “Inoiz ere ez dira izan gehiengoaren kirola; hori bai, aitortu behar da Mutrikun beti izan dela herri kirolekiko zaletasuna eta, ondorioz, beti eduki izan ditugula ikusleak lehiaketetan edota erakustaldietan”.
Etorkizuneko erronka gazteen parte hartzea hauspotzea dela adierazi du Urrestik. Epe laburrera, baina, datorren irailera begira dago, hilabete horretan omenaldiak jarraitu egingo baitu. “Iraileko lehenengo bi asteetan erakusketa bat egingo dugu, garaikur eta domina guztiekin; ostean, Munduko Txapelketa lehiatuko da, eta bideoan emitituko dugu; azken astean, hitzaldiak, haurrentzako herri kirol emanaldiak eta bestelako hainbat jarduera egitea aurreikusten dugu; azken horiek, seguru asko, irailaren 24an egingo ditugu”.
![[Malen jaietako egitaraua]](https://lea-artibaietamutriku.hitza.eus/site/files/2022/07/mutrikuko-malen-jaiak-egitaraua.jpg){kind=link}